(Per leggere l’articolo in italiano cliccare sulla bandierina in alto e selezionare quella tricolore)

Sa crèschida nostra “colletiva” colat dae esperièntzias de custu tipu, de s’

atinu de sos medas incuinamentos, dae comente los barigamus, dae comente
gestimus sas medas contraditziones normativas e polìticas.

E a dolu mannu semus galu a tesu: si dae una banda benit fatu unu donu a sos
sòlitos nòdidos, derubrichende unu reatu de disacatu ambientale dolosu e
colposu (si l’ant a cavare cun una multa pitica), dae s’àtera s’atitudine de
tzerachia polìtica e sindacale cara a chie annùntziat de giùghere traballu
(nointames chi de fatu lu giugat a beru) ìsolat chie imbetzes custos temas los
cheret afrontare pro s’interesse de sos territòrios.
Est capitadu a mie: su primu impignu meu istitutzionale dae sìndigu de Otzana
est istadu unu adòbiu cun s’AIEA, Mario Murgia, Piersandro Scano e cun Felice
Casson a su telèfonu pro faeddare de s’amiantu.
Ma diat pòdere nàrrere de su nono meu a su carbone o contare de s’ausèntzia
polèmica mia a s’inauguratzione de su mega Parcu fotovoltàicu, semper a Otzana…

Ammento galu tzertos cussìgios: lassa istare, sunt àteras sas cosas, si no
andas a s’inauguratzione at abarrare su sinnu negativu pro semper, bi sunt
totus!
Ite sensu at àere fatu sa caraterizatzione de s’àrea cun medas cunferèntzias
de sos servìtzios, si a pustis chie incuinat non bonìficat?
Mi preocupaia pro Otzana in antis, ma in tota onestade cun su colare de su
tempus mi abìgio chi sa situatzione de Otzana, gasi firma dae annos e suta
controllu, est mègius cunforma a sa prus parte de sos àteros sitos…
A dolu mannu, semus galu meda mandrones e pagu atzudos subra custos aspetos,
meda ispetatores, nos istrangiamus cun neghe dae custos aspetos chi imbetzes
tocant su benidore nostru.