(Per leggere l’articolo in italiano cliccare sulla bandierina in alto e selezionare quella tricolore)

Mira chi su sardu est a beru istrambòtigu.
Como unas tantas chidas in su Tg1 de sas 13:30 est andadu in unda unu servìtziu de crònaca, chi sighiat cuddu isportivu subra sa tapa sarda de su Giru de Italia.
Chi esserat o nono deghile, si faeddaiat de crònaca cun unu aìgiu de pregiudìtziu, cundidu cun imagines chi podimus nàrrere, folclorìsticas.
Nudda fora de misura, francu chi pro unos cumpatriotas mios, antzis medas a nàrrere sa beridade chi contende subra a sa umbrosidade chi nos distinghet ant isfogadu totu s’arrennegu contra a sa Rai italiana, malèsiga chi nos isfamaiat.
Sa timeline mia fiat prena de innòrios, gasi comente penso sa bostra.
Indunas, s’est pesada una protesta manna cun esponentes de su guvernu chi abboghinaiant: “ Eris su Presidente de su Guvernu sardu si aeret pòtidu, a sas 10 de note aiat licentziadu du diretore de su Tg1. Totu sa Giunta eris note s’est pesada a caddaridas, ma non tenet aimas reales pro si opònnere a su servìtziu pùblicu”!!!
Ite bellesa! Cantu arrennegu! Canta fieresa!
Ma e oe totu custu ue nch’est? Comente amus naradu, nd’est essende a pìgiu unu degòlliu ambientale mai connotu in sa terra nostra. Una azienda de primore in sa produtzione mundiale de produtos chìmicos, diat àere impreadu sas campànnias campidanesas comente una disgàrriga in logu abertu. Unu dannu a s’ambiente chi non si podet carculare.
Amigos istimados, ma pro custu proite non bos arrennegades?
Fortzis duas paràulas male naradas in unu servìtziu sunt peus de unu sagrastu a s’ambiente de sa terra nostra?
Leghide carchi intertzetatzione e castiade su disatinu chi ant tentu impreende sa terra nostra comente unu lamone de arga indiferentziada.
Si custu bos ponet arrennegu mustrade-lu, faghide-bos intèndere, ca chie nos rapresentat non bidet, no intendet e non faeddat.