Sa “Società Bonifiche Sarde” de Arborea – in licuidatzione dae annos – no at pòdidu èssere comporada dae sa sarda 3A.

Est andada, imbetzes, (e sos de sa Giunta regionale e sos cumandantes territoriales de su Pd nde sunt cuntentos mannos), a sos ferraresos ghiados dae s’ex capu de “Confagricoltura”, in ue b’at, comente sòtziu, De Benedetti.

Custa no est sa Sardigna chi dia chèrrere e chi podet abbarrare a sa ritza. A “Bonifiche Ferraresi”, in càmbiu de noe milliones de èuros, a su chi narat oe “La Nuova Sardegna”, at a andare un’azienda chi podet contare subra de prus de milli ètaros intre Arborea, Terralba, Santa Justa e Marrùbiu.

Paret fintzas chi sos ferraresos etotu siant sos candidados printzipales a si nche leare sas terras pùblicas de Surigheddu e Mamuntanas.

In sas chidas coladas su còmporu de sa Sbs dae bandas de sa sarda 3A fiat brincadu pro neghe de unu “corfu de manu”, in s’assemblea de sos sòtzios chi deviat ratificare s’oferta.

Diat èsssere interessante a connòschere sos retroscenas e sos ispiradores de custa essida foras de pare estremorosa, chi galu una borta nche truvat sa regia econòmica de su presente e de su venidore de sa Sardigna a foras de sa Regione nostra.

Est pro custu chi dolet a lèghere una decrararztzione che a sa de su Pd aristanesu Antoni Solinas: “B’at de èssere cuntentos chi sunt lòmpidos sos ferraresos, s’aberint prospetivas interessantes”.

Eja. Ma pro chie?