Custu est su giassu in limba Sarda.

Per leggere l’articolo in italiano, clicca sulla bandiera in alto, scegliendo l’opzione del tricolore.

Ite nd’est essidu a pitzu dae su primu addòbiu de sa coalitzione de su tzentru-destra, chi s’acùrtziat a sos nastros de partèntzia cun sa responsabilidade de su grandu favoridu? Favoridu – a la contare mègius – gràtzias a sa crèschida manna de sa Lega de Salvini e non pro s’atzione sua a s’opositzione de una de sas peus Giuntas de s’istòria autonomista. In sa mesa b’aiant Cappellacci (chi, onore a su mèritu, pro primu at faeddadu de sa netzessidade de fàghere logu a caras noas) e is segretàrios de Fdi, Psdaz e Riformadores, ausente giustificadu cuddu de s’Udc (su sempiternu Oppi). Novidade ùnica, sa giai mentovada Lega, rapresentada dae su coordinadore regionale suo. Unu tzentru-destra clàssicu, galu sena candidadu presidente, chi at annuntziadu de bòlere traballare a cun fortza subra su programma e pro ideas noas de Sardigna. E chi perintantu – gasi amus intesu in s’oru de sa riunione – si preparat a fàghere intrare intro is suos s’ex presidente de sa Regione Mauro Pili, mancari acusadu pro tempus meda de àere fatu pèrdere Cappellacci, in su 2014, cun sa setzessione sua de Unidos, capatzu de regollire cue su 5% de is cunsensos. Cussu Pili matessi finas oe atacadu a manera grae in su blog suo, dae s’ex parlamentare de An (e ex diretore comunicatzione de sa Rai) Guido Paglia. Pagas novidades duncas. Si no est chi cras sa cosa at a mudare cun aberturas a su tzivismu e a is movimentos chi nde lompent dae sa sotziedade tzivile, de is cales si nde chistionat dae meda. Perintantu, comente a giai naradu, Fortza Itàlia e is alleados suos sunt in isetu de sa proa consiliare subra sa lege urbanìstica: parte manna de sas eletziones imbenientes benidoras s’at a giogare subra cussu tema.