(Per leggere l’articolo in italiano cliccare sulla bandierina in alto e selezionare quella tricolore)

Dae sa Retza Heminas de Sardigna, retzo e pùblico.

Cun sas dimissiones de s’assessore Maninchedda, paret in tota sa gravidade sua cantu denuntziadu bortas medas dae sa Retza Heminas a fàghere data dae sa “bortada de sos mucadores”, in Casteddu e in Tàtari de su 27 de aprile coladu: est oramai concretu e pròssimu s’arriscu de andare a eletziones antitzipadas cun una lege eletorale priva de sa norma subra sa preferèntzia dòpia de gènere, nointames sas assicuratziones pùblicas repìtidas dae autorèvoles esponentes istitutzionales a sos livellos màssimos, cale su matessi presidente de su Consìgiu Gianfranco Ganau.
S’aprovatzione mancada, a oe, de s’istraltzu de sa norma subra sa preferèntzia dòpia de gènere, ponet difatis sa Regione Sarda in conditziones de illegitimidade costitutzionale, in cantu in contrastu cun cantu indicadu espressamente dae sa Lege n. 20 de su 2016, sa cale at detadu normas pro sas regiones pro su riechilìbriu de gènere in sas leges eletorales de sos livellos istitutzionales diferentes cale sa lege 215/2012 subra Consìgios e Giuntas de sos entes locales, sa lege 65/2014 pro sas eletziones europeas, e sa lege 52/2015 pro sas eletziones a sa Càmera.
Premìtidu totu custu pro informare su Presidente Ganau, s’On. Agus e totus sos Cabugrupos, chi in ausèntzia de atos immediados pro s’inserimentu in sa norma de sa preferèntzia dòpia de gènere in sa atuale lege eletorale regionale, sa Retza Heminas, forte de ultres 9.000 aderentes, intendet promòere, paris cun àteros movimentos e sòtzios, etzetzionales e clamorosas mobilitatziones de protesta. Est craru, in prus chi sa Regione sarda diat pòdere èssere tzensurada dae sa Corte Costitutzionale, pro violatzione de sos artìculos 122 e 51 de sa Costitutzione.
Sa misura est prena: pro Heminas no est prus tolleràbile chi sa Sardigna andet a su votu sena perunu mecanismu de garantzia a favore de una ecuànime rapresentàntzia de fèminas in sa màssima assemblea regionale.
Subra de custu amus registradu s’autorèvole e immediadu sustegnu de sa Presidente de sa Camera Laura Boldrini.
Sa situatzione a sa cale nos ant cunduidu sas “ istrategias” ocultas e paleses de setores ampros de su Cussìgiu regionale, est assurda e non si podet atzetare: in manera ostinada, in sa pretzedente e in sa atuale legislatura ant in antis botzadu, cun votu segretu in su 2013, e a pustis rinviadu “sine die” sa discussione e s’aprovatzione de sa norma subra sa preferèntzia dòpia de gènere in sa legislatura in cursu! Si atendeiant passos imminentes, chi non bi sunt galu istados, a pustis de s’auditzione in Commissione Riformas de Heminas ed àteros assòtzios e organismos de paridade, in sa convocatzione de su 3 de maju coladu, dae parte de su presidente Francesco Agus.
Sos fatos sunt nòdidos: sa rapresentàntzia de sas fèminas in sa màssima assemblea eletiva regionale est irrisòria: petzi 4 fèminas subra 60 consigeris, in pessu una fèmina in prus cunforma a su primu Consìgiu Regionale elègidu in su 1949! Unu casu prus assurdu prus chi raru: in 70 annos de istòria, no est mudadu nudda pro sas fèminas sardas.
Custu rapresentat unu vulnus grae de tipu democràticu e costitutzionale, pro ite andat contra a sos printzìpios costitutzionales chi detant normas pro sa promotzione de sa paridade de gènere, e privat su pòpolu sardu de una rapresentàntzia de fèminas e de òmines adeguata e echilibrada pro s’atividade legislativa e pro su guvernu de sa Regione e de sas Istitutziones suas.