(Per leggere l’articolo in italiano cliccare sulla bandierina in alto)

Amus a festare su cumentzu nou de s’annu de su Cabone, sinnu chi est bonu a beru, de bonas auras pro totu sas cosas. S’Annu nou, o mègius sa Festa de Beranu (Chunjie), est sa prus importante intro sas festas de sos tzinesos, sa prus istimada, s’ùnicu momentu de s’annu cando sos ristorantes, Mall mannos, e finas sas bancas, a prusu abertas 7 dies a chida, abarrant serradas.

In Tzina su Chunjie cheret nàrrere “riunione de sa famìlia”, torrare a sa bidda de nàschida, “compudare” sos parentes, fàghere bisitas dae mangianu a sero, mandighende durches, màndigos, licores e cun cuncàmbia de donos. Gasi comente, a sas partes nostras, Pasca de Nadale.

In sas Chinatown de su mundu cheret nàrrere cuetos, isfiladas in bestimentas traditzionales, dansas e ispetàculos in carrela.

E in Casteddu nostra? Pro ite festare su Chunjie? Bos dia a pòdere respòndere a sa fàtzile ca mi sento tzinesa in intro, e chi pro mene est naturale “sentire” custa festa. In realtade su sensu de unu Annu Nou in Casteddu, abertu a totus (sos cumponentes de sa comunidade tzinesa lu faghent a s’ispissu intro de issos, sena carculare sa comunidade locale) est pro favorèssere sa connoschèntzia pare pare, sa difusione de una cultura millenària chi presentat puntos de cuntatu meda cun cussa sarda.

Eja, non sa europea o italiana, ma mescamente sarda, e finas de Barbàgia, printzipiende dae s’impreu de sos “marzianeddi” in sas bufadas, sas atitadoras in sos interros, su “meiren” chi est su “paralimpu” nostru, su costumu de su “naodongfang” chi est a “bortulare” s’aposentu matrimoniale o totu sa domo de sos isposos, cun paritzas brullas e tassas e pratos ghetados a fùrriu, cando andat bene…

Si costumant posca usàntzias e sìmbulos chi sunt a tesu meda dae sos nostros, comente su Dragone o sa Colora, incarnatzione de su male in sa cultura giudàic-cristiana e imbetzes bundàntzia, fertilidade e incùngia in sa tzinesa. O finas s’alapedde, animale in logos nostros chi no est istimadu, ma chi est protagonista mannu in sas decoratziones de su Chunjie.

Pro ite? Custu e ateru meda, l’ais a iscobèrrere su 29! (dae sas 19.45 in su “Mi” Asian Restaurant, in arborada Bonària 22).