(Per leggere l’articolo in italiano cliccare sulla bandierina in alto)

Sa Giunta Regionale at provèdidu a partzire su Fundu Ùnicu 2016 a sas sedes detzentradas. Cun ispantu mannu, pustis sa mutzadura de su 2014 chi galu invòcat vindita, si ischit chi pro su polo universitàriu de Nùgoro at èssere dada una summa galu prus minore cunforma a s’annu coladu, mentres àteras sedes mantènnent o, finas, aumentant sas dotatziones.

S’atu de sa Giunta regionale mustrat s’ausèntzia totale de coidadu pro sas zonas internas e pro s’Universidade nugoresa chi su Presidente Pigliaru aiat naradu imbetzes chi cheriat afortiare, in Nùgoro, in ocasione de sos traballos de inchìngiu de su pianu de rilantzu de sa cussòrgia nugoresa chi galu non si nde bidet nudda de cuncretu.

Paret làdinu chi su fallimentu de cussas promissas de rilantzu est fatu a manera de fàghere pensare chi s’obietivu verdaderu de su “master plan” de sas zonas internas apat a punna, in beridade, a li segare sas ancas.

No est servida a nudda sa crèschida de sos iscritos (30%), s’inghitzu de internatzionalizatzione de sos cursos de làurea, s’annoamentu de s’oferta formativa, sa mobilidade internatzionale si sos detzisores polìticos abarrant in tretos de valutatziones chi sunt prus promissas polìticas chi non crìterios giustos e omogèneos.

Est làdinu chi su tema de sas àreas internas, e de sa tzitade de Nùgoro, est argumentu angenu a custa Giunta de professores chi cada die mutzat, reduet e istringhet cun riferimentu a trasportos, sanidade, iscola e universidade.

Sunt làrganos duncas dae s’amparu in favore de sa gasi narada economia de sa connoschèntzia chi in medas ex catedra nde faeddant, ma in s’ora de detzìdere a manera cuncreta e coerente cun sos proclamas, si nde ismèntigant.

M’apello a sos collegas sìndigos e a sos cussigeris regionales de su territòriu, a sas fortzas econòmicas e sindacales pro cundennare custa polìtica de mutzaduras chi non si podet bajualare in contu a universidade, sanidade, iscola, infrastruturas e trasportos.

Sa mesura est prena e su Presidente at a èssere mutidu a torrare sos contos de custu disacatu pro sa tzitade e pro sa su Tzentru de sa Sardigna.