Dd’ant fata eris in Dèsulu, in is locales de su ristorante Gennargentu, sa mesa temàtica dedicada a sa troticoltura.

Cuncordada de s’Agentzia Laore, paris a duas siendas de su logu, “Troticoltura Istiddà” de Ignàtziu Lai (Dèsulu) e sa de Serusi (Fonne), sa diada at rapresentadu unu momentu de addòbiu de importu tra is istitutziones, is tècnicos de sa Regione Sardigna, is impresas de su logu, is iscolas e àteros tzitadinos interessados.

S’acontèssida, posta in àmbitu de is programmas de s’Agentzia a profetu de su creschimentu de is cussòrgias internas e de s’avaloru de is resursas iticas, at tentu in contu una mesa temàtica de tìtulu “Trotas…una resursa pro su monte”, in ue ant illustradu is caraterìsticas, is particularidades e is fainas netzessàrias pro avalorare custa prodùsida.

S’addòbiu est cumentzadu cun is saludos de su sìndigu de Dèsulu, Gigi Littarru, chi a torradu gràtzias a is chi ant cuncordadu e a totu is presentes.

At coordinadu is traballos su Dot. Antoni Maccioni, diretore de su servìtziu multifainas de sa sienda agrìcula e de sa bio diversidade de Laore. Pustis at faeddadu su Dot. Ciriacu Loddo de Laore subra is resurtos de su progetu de ue est partida sa faina, “Avaloru de sa trota allevada in Sardigna” chi at imboddiadu una classe de s’Istitutu cumprensivu de Torpè, sa pluriclasse de is iscolas mèdias de Gadoni e una classe de s’Istitutu alberghieru de Dèsulu.

Su progetu at tentu in contu s’intrèveru de dies in àula e in sienda pro istudiare su tziclu de sa trota e unas cantus fainas didàticas pro is istudiantes, in àmbitu de is faina numerosas de is siendas iticas e de s’avaloru gastronomicu de is trotas a incuru de su ristorante Gennargentu de Dèsulu. Sa Dot. Jolanda Jolanda Viale -prodùsidas iticas de Laore – at ispricadu is tècnicas pro allevare sa trota.

E galu ant faeddadu Andira Cerimone (multifainas siendas agrìculas e iticas) e Albertu Pili (finantziamentos in sa banda pisca in abba de mare e durche), ambos de Laore.

In tames chi Linu Fancello at faeddadu de is “Is bias de su Cannonau”; sa Dot. Stefània Piras, presidente de su Gal, s’est espressada subra s’importu de ndi bogare retzas tra is privados e is istitutziones; su Dot. Fabritziu mureddu, presidente de su cunsòrtziu universitàriu de Nùgoro, at ispricadu su valore de s’universidade in àmbitu de creschimentu locale; in fines Nicolau Selloni capu de gabinete in s’Assessoradu regionale a su turismu, at faeddadu de s’importu de is polìticas internas pro cuntrastare s’illascada de sa populatzione.

Su mèngianu de aprofundimentos subra sa troticoltura e subra s’importu chi custu setore diat a podere aere pro su creschimentu de su logu est acabada cun unu pràngiu preparadu de su personale de su ristorante Gennargentu.

Is pratos presentados de su coghineri, Giuanni Casula, fiant totus a base de trota, elaborados interpretende cun fantasia sa traditziones sarda: comente primu pratu, frègula de trota; segundos: una panadedda prena de trota, patata e canciofa; trota frita impannada in biculeddos de carasadu; pro tancare trota arrustida in su fogu cun lardu.

Chi s’ierru passadu Laore s’est afainada cun s’allevamentu de is porcos in Dèsulu, oe faeddat a sa populatzione de comente allevare trotas, abarrende in sa matessi linia chi punnat a s’imprenditorialidade e finas a su consumu de is produtus locales, de calidade superiore.

Agricultura e allevamentu de monte sunt possìbiles e sunt una de is craes po istesiare poberesa e abbandonu de su tzentru Sardigna.