Sos “sìndigos lìberos” còntant custu de sa riunione istrinta de eris cun su presidente Renzi e su guvernadore Pigliaru.

Renzi diat àere dadu disponibilidade a isòrvere su problema de s’introdutzione de sas normas subra su bilantzu armonizadu, in prus lis at dadu su cuntatu de Palatzu Chigi de su referente subra sa finantza pùblica. Unu funtzionàriu, duncas.

Finas Pigliaru, at garantidu disponibilidade a isòrvere sos problemas ligados a òperas pùblicas – ispàtziu finantziàriu netzessàriu, avantzos antepostos, e tempos seguros in s’erogatzione de sas resursas a manera de istransire sa formatzione de àteros avantzos, gasi finas pro cantu pertocat a sos mutuos (che a su bandu Jessica).

Passos a fàghere como? Bardiare in contu a sos impignos de Renzi (chi però dae su 5 si nche podet finas dimìtere) e isparghinare sa mobilitatzione in totu s’Itàlia.

“Eris, comente Sìndigos Lìberos amus addòbiadu su Presidente Renzi. Cun belle 40 sìndigos, chi rapresentaiant totu sas Uniones de Comunas, a su Presidente amus intregadu su documentu unitàriu contra sos vìnculos de su Bilantzu Armonizadu – est iscritu in unu comunicadu – Renzi, chi at atinu de sas dificultades chi protzedint dae s’introdutzione de sas règulas de su bilantzu armonizadu a sas Comunas, at dadu ampra disponibilidade a isòrvere su problema, mescamente at postu a disponimentu sos tècnicos suos de s’Ufìtziu de Presidèntzia, tècnicos cun sos cales amus a valutare a cunsonu sa fatibilidade tècnica de introduire sos curretivos rechestos dae nois etotu in sos decretos imbenientes”.

A costàgiu ant addobiadu a su Presidente Pigliaru: “Finas issu at dadu disponibilidade, pro cantu de cumpetèntzia de sa Regione, a isòrvere sos problemas ligados a: òperas pùblicas e ispàtziu finantziàriu collegadu, avantzos antepostos, e tempos seguros pro s’erogatzione de sas resursas a manera de istransire sa formatzione de avantzos noos, gasi puru pro cantu pertocat a sos mutuos”.

Siat Renzi chi Pigliaru ant leadu impignos a favore de sas zonas internas a manera de fàghere investimentos pro s’isvilupu.

Sa nova in ue est?