(Per leggere l’articolo in italiano cliccare sulla bandierina in alto e selezionare quella tricolore)

Una petitzione pro firmare is isbarcos in Sardigna, finas a lompere a s’ipòtesi de una manifestatzione manna de pratza?
Dae Cappellacci una faina chi ammentat a Salvini e chi est perdidora siat dae una bisura polìtica siat dae una, populìstica, de su cunsensu fàtzile chi punnat a conchistare.
Perdidora dae una bisura polìtica antis che totu ca tarea de is polìticos est sa de agatare (e propònnere) solutziones giustas e ‘possìbiles’ a problemas complicados.
Sa chistione migrantes est globale e sa solutzione tocat a dda chircare subra duos pranos: su primu – prus generale – est europeu (est a nàrrere, su sèberu de su guvernu italianu a cumprire is fainas postas oe in atu, ‘cuncordadas’ o mègius ‘aguantadas’ dae Brussellas), sa segunda – a manera istrinta prus locale – est acapiada a su sistema de ‘acollida’ pranificadu a livellu tzentrale e pustis ‘guvernadu’ (a moda de nàrrere) in Casteddu.
Tocat a ispriculare subra chie e comente ispèculat subra sa pedde de migrantes e refugiados, punnende a su dinare de is cassas pùblicas nostras, cun su sistema de sa retzida a ‘tassàmetru’. Is CAS sunt a bias degenerados e como chircant de ddos arrangiare cun sa proposta interessante de is Sprar, in ue ddoe sunt de onni manera polìticas de integratzione galu insufitzientes. Ddoe at bisòngiu de denuntziare is faddinas e de propònnere unu sistema mègius, prus giustu, prus umanu, prus sustenibile.
Tocat seguru a guvernare is fenòmenos de cunvivèntzia difìtzile chi, pro naturalesa, custa situatzione noa nde bogat in is tzentros urbanos prus mannos, in ue desviamentu e incumpatibilidade culturale nde sunt pesende calicunu allarme. A guvernare cun is ainas de is istitutziones democràticas. Avalorende acontèssidas, ma mai faghende de totu s’erba unu faschina. Donende atentzione, integrende, boghende, santzionende. Incurende·si·nde de is cumportamentos e de is situatziones, ca a fitianu si fùrriant crònicos ca is istitutziones, su sistema, s’istadu, su guvernu de su logu sunt ausentes.
In sustàntzia: sa polìtica diat depere agatare mègius solutziones e de prus atùliu pro cuntrastare is mesuras polìticas e sa posta in atu mala issoro e mai s’agatare in acordu cun sa demagogia prus barata chi imputat non a is responsàbiles de is ispeculatziones, de is torchiduras o finas de unu sistema faddidu dae fundu a raighines, ma is duas bortas vìtimas de sa situatzione.
Est a nàrrere chie, pro voluntade sua o ca punnadu, acarat sa loteria de sa vida pro fuire su desertu fìsicu e econòmicu e pustis arriscat de dd’acabbare, sa prus parte de is bortas, in su molinu de s’intolleràntzia in resone de sa poberesa feti, de su colore de sa pedde o pro sa cultura sua, tzertu diferente dae sa nostra.
Pustis, si cherimus discuidare totu custas bisuras de sustàntzia e diamus chèrrere èssere pràticos feti e pensare a is efetos berdaderos de s’alabantzare a is intollerantes, est a ischire chi custu cumportamentu non pagat mancu in sentidu eletorale: pro onni indignadu de tastiera o de imprenta chi abòghinat, ameletzat e iscarràschiat òdiu conca a is immigrados, ddoe at sete o oto tzitadinos mudos (giòvanos in particulare) chi dae luego si nde istèsiant. Chi s’informet Cappellacci. Chi istùdiet is chircas e is flussos eletorales in is natziones in ue ddoe at chie at crètidu de agatare sorte bona setzende su caddu de s’intolleràntzia istèrile.
Ddoe cheret calma, umanidade, bonu sentidu, naturale forte e ànimu.