(Per leggere l’articolo in italiano cliccare sulla bandierina in alto e selezionare quella tricolore)

M’ammento in su 2002 cando, in s’interis de s’ocupatzione de sa Roca de Cane ‘e Chervu dae parte de sa populatzione de Muros contra s’ativatzione de sa gava aviada dae sa Sotziedade Caolino Panciera, chi cheriat bogare materiale calcàreu a duos passos dae sa bidda, deo e àteros amigos semus andados a dare una manu de agiudu a sa càusa promòvida dae sos tzitadinos de Muros.

Aimus aizu finidu de iscrìere su lìberu subra Ossi e sas cartas chi discriiant s’unione de sas duas bidda induna ùnica Baronia, cussa de Ossi e Muros, fiant a ata de manu.

Pro tantu aimus pedidu a su Comitadu chi si oponiat a sa gava si esseret servidu a carchi cosa tratare una curtza istòria de sa bidda. E custos m’aiant torradu resposta nende: in custu momentu totu podet èssere ùtile.

Umpare a nois medas literados e artistas aiant leadu parte cun su contributu issoro a sa bìnchida de una comunidade minore contra unu colossu chi nde cheriat bogare a issos su territòriu e pro tantu su logu de vida. Sa pregunta chi nos aimus postu, nois chi non fìamus de su logu, fiat custa: ite podimus fàghere pro agiuare sa populatzione de Muros?

In cussu momentu mi fiat bènnidu a conca Mozart cando in su 1782, in ocasione de s’intrada in gherra de s’Austria, sa Pàtria sua, pro sa cunchista de Gibilterra, s’aiat postu sa matessi pregunta: ite podet fàghere unu musicista pro leare parte a sa càusa de su pòpulu sou?

Issu si fiat intesu comente unu “Bardu cantore” de àteros tempos e, pro agiuare sos soldados a sa bitòria, aiat detzisu de iscrìere s’òpera “Bardengesang auf Gibraltar”.

Como sa populatzione de Ossi depet afrontare una batàglia sìmile. Barighende sa voluntade de su Cossizu comunale, chi s’est isprimidu giaramente contra s’ativatzione de sa gava de Su Padru a duos passos dae sa bidda, sa Società Monte Rosè, chi at leadu in afitu sa gava dismissa de sa Sotziedade Italcementi, cun s’autorizatzione de s’Assessoradu Regionale a s’Indùstria, at detzidu de torrare a comintzare s’atividade istrativa.

Oe, pro tantu, tocat a nois a nos pònnere sa matessi pregunta: ite podimus fàghere pro frimmare custa sotziedade chi cheret operare in su territòriu de Ossi chentza su cunsensu de sa comunidade? Sa resposta est pretzisa a cussa chi nos aiant dadu in su 2002 sos tzitadinos de Muros: totu podet èssere ùtile.

Pro tantu ognunu de nois si devet pònnere custa pregunta: ite poto fàghere pro dare su contributu meu a sa càusa de sos tzitadinos de Ossi? Intantu podimus comintzare a leare parte a s’Assemblea populare chi s’at a tènnere custu sero in Ossi (su 23 de maju 2017), a ora de sas 18,30, in piata S’Arzoledda.

Luego a poi de s’Assemblea b’at a èssere unu radunu peri sa gava dismissa de Su Padru, in su tretu in ue, traessada sa circunvallatzione de Su Tuvu, s’intrat in sa sighidura de su caminu de Santu Nenardu (istrada pùbblica comunale), dae ue si podet bìdere s’istadu de sa gava e su territòriu ispantosu chi l’inghìriat.