(Per leggere la poesia in italiano cliccare sulla bandierina in alto)

TUI SES SU LOGU
a Nereide

Tui ses su Logu
chi aberit is giassus
e acollit is passus
de chini no iscit
ita ddoi at addia de s’erriu.
Pintadera
e ses terra de ascurtu,
Reina antiga
e ses Mama notzenti
in su trobicu ancà currint is umbras
a ndi furai sa luxi a primori
e su dolori no lassat sa gruta.
Inguni contas is milli passadas
de is sogas antigas
e pitziat su giogu
ca imprentadas a fogu ddoi funt is anderas
arribbadas a innoi de tanti caminu.
Tandus t’indullis
e che luna in su putzu
torras a s’àcua
su poita de su celu.