Forsis su maistru Gian Battista Ledda, cumpositore e autore de “Paràulas e Sonos de Sardigna”, prima òpera didàtica in limba sarda e in sas variedades alloglotas, non podiat immaginare s’efetu de sa melodia noa cumposta pro su “Deus ti salvet, Maria”, pedra di tocu pro totu sos coros polivocales e sas boghes solistas de s’ìsula nostra, caraterizada da sa contralto Maria Paola Salaris. Sàbadu, 8 de trìulas, s’emotzione, in sa crèsia parrochiale de Sant’Austinu de Alà dei Sardi, est colada dae un’ascurtadore a s’àteru e sa tzocada de manos essida ispontànea dae su pùblicu non finiat mai. Est istadu unu sero ricu de emotziones, a comintzare dae su “Procurad’e moderare”, armonizadu dae Antonio Deiara e interpretadu dae su Coru Sant’Austinu de Alà con sa diretzione de Silvio Bossi. A pustis de sos saludos de su sìndigu de Alà Frantziscu Ledda, chi at sutalineadu sos significados culturales e sotziales de su progetu, e de su presidente Mimmo De Vanna, sos Gigantes de Monti Prama ant ocupadu s’iscena con sa maestosidade e grandesa de s’antiga genia sarda, cun sa boghe de su barìtonu Marco Solinas. Un’incantu sa melodia tabarchina, acumpangende sos versos de Mariatina B. Biggio, interpretada dae su sonu sedutore de sas arpas, austera e irònica sa compositzione bitemàtica in catalanu de S’Alighera, apassionada sa “Corsicana”, cun sos versos de don Baignu Pes e sa boghe de sa soprano Annamaria Deiana. Sas tzocadas de manos pro “Fortza Paris”, elaboratzione de s’innu de sa Brigata Sassari, sunt istadas bene retzidas dae cu coru e orchestra de pitzinnos “Cuncordu e Armonias” con un’istràngiu importante: su coronellu Luciano Sechi, autore de sa melodia “populare”, est a nàrrere atzetada dae sos sardos. Su passu de sos boes in sa professone de Santu Efis, su testu de padre Vittorio Angius, paris cun sos “Gosos de Chida Santa”, ant fatu torrare a mente sa costumàntzia e s’istòria de Casteddu e de Aristanis, mentres chi Nùgoro est istada presentada cun una atualizada “Assandira” orchestrale. Tàtari est istada tzelebrada cun una delicada romanza acumpangende sos versos de Cesarino Mastino; Otieri cun s’alligria de “Sa Festa de su Remèdiu” de Maddalena Morittu. Non podiat fartare “Launeddas”, omenàgiu a Andreas Bentzon. Podent èssere cuntentos de a beru sos maistros preparadores Guglielmo De Stasio (cordas), Gianluigi Pani e Giovanna Virdis (bentu e percussiones), Vincenzo Cossu (coru e solistas) e Loredana Serra (arpas). Atzisadore su libreto in tres limbas, sardu, italianu e inglesu, con su logo de s’isponsorizadore.

S’òpera, imbellida dae sa boghe narrante Cristiano Becciu, s’est serrada cun unu solenne “Procurad’e Moderare” pro solistas, coru e orchestra de pitzinnos, chi at mustradu sa bellesa de su chi diat pòdere divènnere s’innu de sa Sardigna. Su bis fiat obligatòriu.

Alà dei Sardi, sa die 8 de trìulas,est divènnida su coro musicale e poèticu de s’ìsula nostra. In su pùblicu, caraterizadu dae sa presèntzia de giòvanos meda, su segretàriu de su Prèmiu Otieri de Literadura sarda Antonio Canalis e su presidente de sa Giuria, Attilio Mastino, s’ideadore de sa Biennale Ozieri per cori tradizionali sardi Antonello Lai, sa fìgia de su maistru nugoresu Salvatore Nuvoli, Eta, s’autore de s’Invocatzione a sa Musa, Raffaele Secci e sos rapresentantes de sa Brigata “Sassari” imbiados dae su generale Gianluca Carai. Su progetu triennale de s’Associazione Coro “Sant’Austinu” at a sighire in su 2018 cun sa segunda Òpera, semper in limba sarda.
Alà dei Sardi Gian Battista Ledda