(Litera a su Subraintendente pro sos benes archeologicos de Casteddu e Aristanis, a su presidente de sa Regione, a su sindagu de su Comune de Cabras, a sos retores de sas Universidades de Casteddu e Tatari)
Illustrìssimos rapresentantes istitutzionales, s’Assòtziu “Sardigna nostra”, dae a mie rapresentada in calidade de Presidente, pedit chi bèngiat postu in primu logu su vìnvulu archeològicu e paesagìsticu subra tota s’àrea in tundu a su giassu de Monte Prama, in su Comune de Cabras, e, de cunsighèntzia, siant ispropriados pro interessu archeològicu (art. 97 de su d.lg. 42/2004) sos terrinos pertinentes s’iscavu e cussos a inghìriu, pro sos motivos chi sighint:
• su 12 de maju 2015 sa Subraintendèntzia Archeològica de sa Sardigna at aviadu una campagna de iscavu in su giassu de Monte Prama pro su fine de recuperare e repristinare sos iscavos Bedini e Tronchetti tentos dae su 1975 a su 1979. In s’andera de sos reghentes iscavos ant batidu a sa lughe unas cantas istàtuas de sos gasi narados “Gigantes” e diversos repertos de artu balore culturale, arrichende in tale manera su giai interessante Museu archeològicu de Cabras;
• in su matessi tempus de sos archeòlogos, at operadu in su giassu de Monte Prama su Prof. Gaetano Ranieri, ordinàriu de Geofìsica Aplicada peri sa Facultade de Ingegneria de s’Universidade de sos Istùdios de Casteddu, chi, servènde·si de s’istrumentatzione Geo Radar e de àtera teecnologia pro sa relevatzione suterrània de fràigos o trastos, at iscandalliadu belle 16 ètaros de terrinu intundu a su giassu, individuende, in prus a sas istàtuas imbènnidas in iscavos reghentes, mìgias de àteros repertos, cramados in tèrmines tècnicos “anomalias”;
• a si mòvere in sintonia cun sos Archeòlogos e cun su Prof. Gaetano Ranieri sunt istados fintzas sos proprietàrios de sos terrinos a inghìriu a su giassu, meres chi, no apende retzidu peruna limitatzione a s’impreu de sos campos issoro, ant in tota tranchillidade mudadu sos terrinos agrìculos in bìngias, prantende ètaros de barbatellas cun tantu de impiantu de abbadòrgiu e, de cunsighèntzia, giutende su balore de cussas terras abisumeu dae 1 a 9;
• ccunsideradu chi oe, dae una die a s’àtera, sas barbatellas de cussos terrinos privados, in ue su Prof. Gaetano Ranieri at fatu sas indàgines e rescontradu mìgias de anomalias, podent èssere dotadas de palos de sustentu intrados in terra a fundu finas a unu metro, est pro tantu de immaginare cale genia de perìgulu imminente sunt currende sas istruturas archeològicas chi sunt suta cussas terras si sos proprietàrios de cussos terrinos detziderent de interbènnere.

In cunsideru de cantu subra espostu, su presente Assòtziu “Sardigna nostra”, in relata a s’interbista fata a su Prof. Gaetano Ranieri, chi at respostu a sas preguntas subra su giassu de Monte Prama (su documentu podet èssere abbaidadu in su canale Youtube.com a s’indiritzu https://www.youtube.com/watch?v=OAQNvf5ZXvM&t=331s (prima parte) https://www.youtube.com/watch?v=obQSTb33gIs (segunda parte) ponende in craru sos resurtados otènnidos dae sa chirca sua e s’importu chi custos diant pòdere àere pro s’isvilupu culturale de sa Sardegna e de su Mediterràniu in casu bennerent atzertados e batidos a sa lughe dae iscavos noos,
PEDIT
Chi bèngiat postu in primu logu su vìnculu archeològicu e paesagìsticu subra tota s’àrea in tundu a su giassu de Monte Prama, e, luego a pustis, chi siant ispropriados pro interessu archeològicu (art. 97 de su d.lg. 42/2004) sos terrinos pertinentes s’iscavu e cussos a inghìriu, pro tota s’àrea de sos belle 16 ètaros indagada dae su Prof. Gaetano Ranieri.