(Per leggere l’articolo in italiano cliccare sulla bandierina in alto e selezionare quella tricolore)

Cando bi sunt investigatziones penales de livellu importante, chirco de non cummentare fatos ispetzìficos cun s’ispera chi sa magistradura fatet su dovere suo fintzas a persighire a manera pretzisa is reos.
Posca b’ant is pensamentos de sa gente comuna chi si preguntat su proite bivet in unu Paisu in ue ant postu a disponimentu milliones de fundos pùblicos pro sustènnere siendas incuinantes, cara a àteras atividades mancari piticas, chi no ant guadangiadu pro perunu contributu e benint tribuladas dae controllos e osservàntzias. E, bortas meda, sunt finas custrintas a serrare butega ca non tenet fortza bastante pro subravìvere in custu mercadu chi totu assegurat francu sa lìbera (e curreta) cuncurrèntzia.
In fines is responsabilidades polìticas, chi non si podent cuare a palas de sa durada de is protzessos penales.
Essit a pitzu custu iscàndalu ma poi càstias unu situ istitutzionale e leghes:
“S’Agentzia regionale pro s’amparu de s’ambiente de sa Sardigna esèrtzitat a manera particulare funtziones de:
– controllu de is fontes de pressione ambientales determinadas dae s’atividade umana chi, pighende risorsas e traballende cun s’ambiente a inghìriu, produint impatos subra s’ambiente (iscàrricos, emissiones, àliga, isfrutamentu de su terrinu, radiatziones, etc.);
– avèrguadura a su istadu ambientale determinadu dae sas vàrias orìgine (abba, àera, terrinu, etc.);
– suportu tècnicu a sa amministratzione pùblica pro parare fronte a is pressiones e megiorare s’istadu de s’ambiente (Pranos, progetos, etc.)”
Tocat duncas a si fàghere carchi pregunta e torrare carchi risposta:
Totu bene at funtzionadu?
Bene dd’apo tutelada sa vida e sa salude de is tzitadinos?
Responsàbiles bi sunt e, in casu, ite podimus fàghere pro ddos cambiare?
Giustu est, fintzas is 20 annos imbenientes, chi intro a s’àrea metropolitana in ue bivent (e papant) 1/4 de is abitantes de sa Sardigna e a costàgiu cun una de is prus importantes àreas ùmidas de s’Europa pro chistione de bio-diversidade, sighint a operare totu custas indùstrias chìmicas o petrolchìmicas?
Cales sunt is sèberos chi ant fatu is mègius regiones de s’Europa pro chistiones che a custa?
No isco bois ma deo pretendo rispostas.