(Per leggere l’articolo in italiano cliccare sulla bandierina in alto)

It’est chi aunit sa sentèntzia de sa Corte Costitutzionale cun sas sentèntzias reghentes de su tribunale de Casteddu a cara a medas consigeris regionales?
It’est chi aunit una sentèntzia de importu in pitzu a sos usos tzìvicos cun pinnas Mont Blanc, porcheddos arrustu, cojuos, cumbènios brullanos e busacas chi cabent prus de bèrtulas antigas?
Petzi una cosa: su dannu a su bene pùbblicu fatu dae sa polìtica regionale.
In su primu casu est interbènnida sa Corte Costitutzionale pro arressare sa agudèntzia de custa Giunta pro sos terrinos a usu tzìvicu, chi segundu sas dispositziones, chi sa sentèntzia etotu narat” produint s’efetu de menguare su patrimòniu colletivu de petzos mannos de territòriu” cun sa pràtiga lestra lestra de nde las bogare dae su vìnculu de su demàniu pro pòdere “ sanare totu sas ocupatziones abusivas sena fàghere perunu sèberu”.
Duncas custa borta sa Corte Costitutzionale italiana s’est agatada in sa cunditzione de dèvere amparare sos benes colletivos de sos sardos dae una polìtica regionale chi punnaiat a cuntentare unos tantos abusivos contra a sa colletividade chi est sa propietària bera de sas terras tzìvicas.
Tocat a nàrrere chi custa polìtica chi a cara a s’Italia est prus papista de su papa, prus realista de su re e prus italianista de s’Italia, intames cun sa Sardigna est prus vàndala de Genserico.
Pro cantu pertocat totu sas cundennas pro peculadu, leamus pro bonu su presumu de innotzèntzia e isetamus chi sa Cassatzione isaminet sos recursos. Mancari chi si tratet de cundennas fintzas de segundu gradu, e custu nos ponet in oriolu. Nos oriolat ca semus faeddende de polìticos chi aiant tentu sa fidùtzia de sos tzitadinos e chi -segundu sas acusas- si diant èssere apoderados de su dinari de sa colletividade.
Duncas faeddamus de unu fenòmenu ùnicu in s’istòria chi est resessidu a aunire sa polìtica sarda no intames intre sos duos: majoria e oposizione ma fintzas cun s’annanta de su de tres e custu est capitadu cun consigeris elegidos in su tzentru destra, tzentru manca, passende dae su psd’az. E s’oriolu no intames de menguare, fortzis aumentat, cando bides chi b’at consigeris chi torrant parte de su dinari cando lis pedint de nde dare contu.
Unu cumportamentu chi no ischis mancu comente carculare. Diat pàrrere comente a chèrrere atrogare sa fura e tancare sa chistione cun una ispètzia de sanatòria a sa bona, torrende su male leadu posca de los àere iscobiados comente sos pitzinnos chi furant sas caramellas in butega e totu agabbat torrende sa cosa furada e cun una abruncada e una figura mischina.
Ma inoghe non si tratat de caramellas e de pitzinnos ma de milliones de dinari pùbblicu e de furas pro sas cles sos tzitadinos comunes e pro prus pagu meda che diant parare in presone.
O fortzis custu fatu de torrare su dinari lu dias pòdere carculare comente sinnu de onestade, ma tando sa pregunta chi ti faghes est: si pensias de lu pòdere leare in manera onesta ca ti tocaiant, proite lu torras?
E peristantu chi ses assartiadu dae custas dudas, ti faghet a gana mala su de ischire chi custas pessones elègidas pro fàghere su bene de su pòpulu sunt pagadas puru bene meda.
In una terra in ue sa medade de sos giòvanos est sena traballu, ue sos pitzinnos si nch’andant in disterru ue sa gente si apicat pro su disisperu de èssere sena traballu, in ue millàrias de pessones traballant in nieddu e onni tantu e, a ispissu, petzi pro setighentos euros su mese…
In una terra disisperada, cantu corazu bi cheret- semper chi si li potzat nàrrere corazu a cussa chi est petzi s’atza de s’asuria- pro lòmpere a furare àteros milliones a sa pòbera gente mancari gosende-si istipèndios de nababbos?
Cantu bisongiat a èssere coritostos, cantu si depet èssere simigiantes a sos Savoia pro lòmpere a nche furare sas terras comunitàrias pro cuntentare una màniga de privados e de ispeculadores asuridos?
Cantu bisongiat de èssere inimigos de custu pòpulu oprimidu pro lòmpere a èssere punidos fintzas dae sa matessi lege de su dominadore?
Oh pòpulu sardu, ma a beru cheres sighire a ti lassare guvernare dae custa classe polìtica?