(Per leggere l’articolo in italiano cliccare sulla bandierina in alto)

Su 77% de sa popolatzione de s’Alighera cheret connòschere e impreare s’Aligheresu (Catalanu de s’Alighera e su 92,3% est in favore de s’introdutzione de su Catalanu e de su Sardu in s’iscola.
Est cantu torrat a pìgiu dae s’inchesta “ Els usos lingüístics a l’Alguer”, presentada in sas dies coladas in tzitade in ocasione de unu cunvegnu pùblicu a su cale at partetzipadu su vice-sìndigu Antonello Usai, e su diretore generale de sas polìticas linguìsticas de sa Generalitat de Catalunya, Ester Franquesa.
Cun issos Francesc Ballone, diretore iscientìficu de s’Enquesta d’Usos Lingüístics a l’Alguer 2015, Anna Torrijos de sa Direcció generale de Política Lingüística e Joan-Elies Adell, Ofici de l’Alguer de la Delegació de la Generalitat de Catalunya a Itàlia.
EULA 2015 giughet una visione globale e rigorosa de sa connoschèntzia de sas limbas de sa popolatzione de entidade majore de sa Comuna de s’Alighera, pro su chi pertocat sos impreos chi nde benint fatos, sa trasmissione intergeneratzionale e sas opiniones de sas diferentes pessones intervistadas.
Si tratat de unu bagàlliu de connoschèntzia indispensàbile subra su cale indiritzare sas diferentes polìticas linguìsticas, a sa base de sos rinsaldados raportos culturales, econòmicos e commertziales cun sos paisos catalanos. Ùtile pro marcare unu cuadru de su valore iscientìficu-culturale de sas diferentes limbas faeddadas in sa Riviera de su Corallu, terra vocada a su turismu e dae custu influenzada in manera funguda.
S’88,2% de sos intervistados at decraradu de cumprèndere s’aligheresu, cun su 50,5% de pessones in gradu de lu faeddare: aprofundende s’anàlisi subra de sa popolatzione chi narat de “cumprèndere bene s’aligheresu” est su 30% a decrarare de “lu faeddare in manera curreta”.
Sos datos rifletent fintzas chi esistit unu protzessu de interrutzione de sa trasmissione linguìstica intre sas generatziones de s’aligheresu chi cumentzat giai dae sos annos ’60 e oe sighit. Su 24,1% impreat s’aligheresu comente limba pro cumentzare, però est s’8% chi lu impreat cun sos fìgios, reduende sa possibilidade chi custos lu achiressent intro de sa famìlia. Comente limba abituale s’Aligheresu rapresentat su 18,5% chi creschet fintzas a su 26,1% comente limba de “identificatzione”, cun sos impreos reduidos a segunda de su cuntestu sotziale.
“Els usos lingüístics a l’Alguer” at a èssere rapresentadu a la Matinal de Barcellona pro s’organizatzione de sa Diretzione generale de sas Polìticas Linguìsticas, in sa die de chenàbura 19 de maju in su Dipartimentu de sa Cultura.