(Per leggere l’articolo in italiano cliccare sulla bandierina in alto)

Est difìtzile a non cumpartzire sos pistighìngios de su sistema de sas autonomias locales – rapresentadas a s’assessoradu cumpetente e a sos collegas sìndigos dae su presidente de s’ANCI Sardigna Emiliano Deiana – a propòsitu de s’aprovatzione in forma preliminare, cun una presse mala a acrarire e finas assumbrada, de sa delìbera de Giunta regionale cun sa cale si mudant sas Lìnias ghia chi pertocant su Reis, gasi comente prevìdidu dae sa L.R. 18/2016.
In antis de totu ite est su Reis? Est su rèdditu de insertada sotziale. Una mesura regionale noa contra a sa povertade isparghinada e a sustentu de sos inocupados, chi diant dèpere contivigiare sos Comunes cunforma a una gàbbia istrinta pensada in Casteddu e a una graduatòria ùnica.
Sa presse, pròpiu in s’ìnteri de s’acaramentu cun s’Anci, est istada cunsiderada de cundennare in su mèritu e in su mètodu.
Sas rechestas de sos Comunes rapresentadas dae Anci Sardigna non las ant acollidas de su totu: “Amus bidu chi bi fiat un’iscàmpiu in sa chistione e sa possibilidade de megioros rispetu a sas Lìnias ghia aprovadas in nadale de s’annu passadu, ma petzi pro sa gestione de sa fase transitòria” at iscritu Deiana, in sa lìtera imbiada a sos collegas sìndigos, “ma non nos ant, a beru, dadu isperas bonas rispetu a sas resursas menguantes pro s’annu 2016 e duncas abarrant sos pistighìngios pro sa cobertura de sos 16 milliones chi no ant istantziadu, rispetu a cantu assignadu in sa finantziària de s’annu 2015 e a cantu programmadu pro s’annu 2017”.
Pro su restu sas resursas annuntziadas pro sa cobertura eventuale diant dèpere èssere leadas in contu a fundos europeos e sugetas e protzeduras de bandu, duncas podet dare chi non acuntentet sos bisòngios de sos tzitadinos chi dae prus de 15 meses sunt isetende de èssere leados in càrrigu dae sos servìtzios sotziales.
“Sutalineamus chi s’Assòtziu est contràriu a sa previsione annuntziada, in s’atu deliberativu, de ativare una “graduatòria regionale”, chi pro su restu non est prevìdida in s’impiantu de sa lege regionale 18/2016; non s’ischit de veras chi siat prevìdida una graduatòria eventuale anàloga pro s’atuatzione de su REI natzionale, dadu chi pro su decretu atuativu s’at a fàghere una interlocutzione cun sos rapresentantes de sos Comunes a livellu de Anci Natzionale”, sighit Deiana, “a su contràriu, custa borta puru, comente giai capitadu in passadu, pro àteras ainas legislativas natzionales che a s sa lege 162/98 o mesuras che a “Ritornare a casa”, amus bidu chi b’est sa volontade de sa Giunta regionale de aviare protzessos de gestione direta de funtziones e servìtzios chi su cuadru normativu natzionale e regionale at atribuidu petzi a sos Comunes”.