Sa retzentė bìsita de su Presidentė de sa Repùbbrica Popolarė Cinesa in Sardìnnia at ingendradu avispu intra polìticus, impresàrius et esponentės de sa sotziedadė tzivilė sarda. Su presidentė cinesu at manifestadu s’interessė suu pro sa segunda ìsula de su mediterràneu pro supefitzė e prima pro isvilupu de sa costera.

S’atentzionė parit cuntzentrada prus de totu in is produtus de su setorė primàriu – calincunu, cumentė su latė in pruinė, giai ispainadu a ladu in su mercadu cinesu – qui diant podir faėr de bolanu pro sas esportatzionės sardas in Cina. Su mercadu cinesu pro sa mannària sua diat podėr essėr un’importantė fatorė de repìlliu pro una economia pitica cumentė sa nostra.

Fintzas su setori tertziàriu est interessadu dae s’istòrica bìsita de sa delegatzionė cinesa.
Xi Jinping at infatis notadu sas bellesas naturalės e de su paesàgiu de s’ìsula, oferrendė unu fortė acudimentu de turistas cinesus a pustis de sa bìsita sua.

Intramus, sa natura de sa missionė cinesa in Sardìnnia si podėt analizar puru de àteras prospetivas qui ponint calicunu interrogativu a pitzu de is arrexonės de sa disabetada bìsita.
Est infatis probabilė qui sas motivatzionės qui ant portadu sa màssima autoritadė cinesa a lompir in Sardìnnia no siant scheti de natura commercialė ma puru econòmicu-polìtica, istratègica e geo-istratègica.

S’ìsula, gratzias a sa particularė positzionė qui tenit, est adata a essėr infatis una janna de intrada in su mediterràneu ocidentalė. S’importàntzia de su controllu de su marė pro un’Istadu continentalė cument’est sa Cina est dimostrada de sa “istrategia de su filu de perlas”, aundi su filu rapresentat una lìnia de marė qui diventat sempėr prus longa, qui est partida de su Marė Cinesu Merdionalė e arribat oė, traessu su Marė Arrùbiu, fintzes a su Mediterràneu Orientalė.

Sas perlas rapresentant invecės sos portus qui si agatant in sos puntus craė pro su consolidamentu e su controllu de custa lìnia marìtima e de sas bias suas e duncas pro s’avantzada cinesa in sos marės, siat in tèrminės commercialės e de crèschida econòmica siat in tèrminės de influèntzia polìtica et egemonia (segundu calicuna interpretazionė custa istrategia, assumancus regardu s’Ocèanu Indianu, mirat a incordonare s’Ìndia, ponnendė-sì de fatu in una positzionė de vantàgiu istratègicu-militarė conca a s’àteru gigantė asiàticu emergentė).

Sa polìtca adotada pro cunsighirė custas positzionės istratègicas est incentrada a pitzus de su “soft power cinesu”, unu mètodu de impreu de su poterė no fortzosu e non agressivu, qui a intra de sa istrategia de su filu de perlas benit postu in èssėr atravessu relatzionės internazionalės basadas su Partnership istratègicas aundė sa Cina, pro influentzar e cumbinchėr sos Istadus, sas natzionės e is regionės costeras qui da interessant, ponit a pitzu de sa mesa totu su qui tenit in abbundàntzia: investimentus, finàntziamentus, partetzipatzionės a sas operas infra-istruturalės mannas, delocalizatzionės de impresas e s’obertura de su mannu mercadu suu a sos iscambius commercialės.

In cambiu su giganti aisiàticu ponit cument vìncolu sa cuncessionė de àreas portualės, sa cundivisionė esclusiva de zonas marinas istratègicas, de territòrius, de resursas econòmicas, mineràrias e de àteras resursas qui serbint a sa Cina.

Cunsiderendė totu custu, est duncas ipòtizabilė qui sa bìsita de Xi Jinping cun sa delegatzionė sua avattu non fessit una semplicė frimada o trasladamentu tècnicu ma unu modu pro sondare in manera su prus possibilė informalė una terra cun sa calė sa Cina at giai incumentzadu a istrìnghere unu sòlidu raportu, cunfirmadu puru de sos retzentės acordus intra s’ìsula e su gigantė cinesu de s’arta tecnologia Huawei, qui oberrit bisuras interessantės siat in su setorė tertziàriu siat in cussu secundàriu.

Ma c’est àteru: s’istrategia cinesa est basada puru a pitzus de sa “diplomatzia culturalė”, intravessu de custa sa Cina bolėt fai connosci sa limba sua, sa cultura sua e cheret oferrėr un’imàginė positiva de issa basada a pitzus de paxė e coperatzionė. Diplomatzia culturalė qui benit atuada atravessu de s’obertura de sos “Istitutus Confùcio” e de sas “Àulas Confùcio”, comentė cussa inaugurada su 29 de capudanni passadu in s’Universitadė de Casteddu.

Totus custus fatorės, qui funt caraterìsticus de sa trama de su filu de perlas, si podint bìėrė in sa dinàmica de sas relatzionės e in sos acordus qui s’ìsula est istipulendė cun sa Cina.

Ma sa penetratzionė cinesa in su mediterràneu est giai incumentzada su 3 de su mesė de ladàmini 2010, candu sa Cina at firmadu una Partnership istrategica cun sa Grècia qui previdiat intra is àteras cosas sa concessionė de una partė de su portu e su Pireu a un’importantė socedadė cinesa, rendendė de fatu sa parada greca unu de sos prus importantės tzentrus pro su commèrciu intra Asia et Europa. No est pro casualidadė qui su Pireu est postu in su mediterràneu orientalė, qui est adatu a èssėr una punta prus a in antis pro sa penetrazionė cinesa in sos marės ocidentalės.

Pro tennir un’idea de s’estensionė de su filu de perlas cinesu ddu si podit immaginar atraessar sas bias printzipalės e sos portus giai ammisquiadus. Intra custus torrant a risartar pro importàntzia istratègica: Singaporė (in sa citadė-Istadu qui tenit su matessi nòmini); Colombo (Sri Lanka); Gwadar (Pakistàn), Gibuti (in s’omonima Repùbrica); Suez (Egitu); Pireu (Grecia). Cumentė si podėt deduir de su camminu sighidu fintzas a immoė, su portu de Casteddu s’agatat in su percursu naturalė de su filu de perlas qui de levantė s’est movendi a ocidentė pur atravessu de su mediterràneu.

Nudda de istranzu duncas si sos cinesus diant essėr interessadus immoė etotu a aciungėr una perla noa a su filu insoru, su Portu de Casteddu, postu intra su canali de Sardìnnia qui est un’importantė janna de intrada, controllu e trànsitu in su mediterràneu ocidentalė e a pitzus de totu est unu pontė naturalė, in paris a s’isula qui ddu subrastat, versu Gibilterra e s’Atlànticu.

Est unu filu qui s’istar giai criendė intra Sardìnnia e Cina, qui diat depėr portar a noas istrategias de mercadu in s’ìsula e in su lungu tempus a nous isvilupus in sas relatzionės internatzionalės, siat politicus, siat istratègicus.

Sa domanda qui benit naturalė a custu puntu est si sa Sardìnnia e is gubernadorės suus ant a essėr capassės de si ponnėr cara a cara cun custu desafiu cunsiderendė is gravės problemas istruturales qui pesant a pitzu de s’ìsula e qui podint faėr de totu custu un’oportunidadė fartada o un’atera delusionė de sas isperàntzias bixinas a cussas tenias in passadu in matessi circustàntzias.

Is varius elementus de debolesa de sa Sardìnnia, polìticus, socialės, istitutzionalės, econòmicus, de infra-istruturas etz… riscant de acreschėr cussu raportu de dipendèntzia qui règulat sas relatzionės de sa Sardìnnia cun s’alenu e dda disterrat a èssėr unu sogetu tertzu e passivu a in antis de is quistionės inernatzionalės qui·dda riguardant.

Forsis sa Sardinnia diat tennėr bisòngiu, in paris cun is investimentus e sos iscambius comercialės, de unu disėgnu e de un’idèa de isviluppu caraterizados de pagus, frìmus e sìmplitzės puntus o step, cumentė cussos qui fundant su disėgnu istrategicu e culturalė de sa Cina de su 2006: heping, qui bolit narrėr isvilupu iscientìficu; tuxing, qui cheret narrėr arreconnoschimentu; infinis shexing, ossiat isvilupu e duncas sotziedade pròspera, non scheti in s’economia ma in sa cultura puru.