Su “Chenàbura Nieddu”. Totus nde faeddant, medas costumant a nde praticare sas còmporas, ma pagos nde connoschent su significu e s’orìgine.

Sende chi est una chistione de contu non istremenadu, pro nde leare custa curiosidade bastat a isparghinare su chi si podet imbènnere in artìculos de sa retza, mescamente in sas entziclopedias in linia.

Su Chenàbura Nieddu, in sos Istados Unidos, est sa die imbeniente a sa Die de su Ringratziamentu: a manera traditzionale daet printzìpiu a sas compòras de sas Pascas de Nadale.

Narat Wikipedia: Est una die, mancari non siat die nòdida, de importu mannu pro su chi pertocat su cummèrtziu ca est un’indicu de balia siat pro s’intentu de comporare, siat, a manera indireta, pro sa capatzidade de gastare de sos consumadores istatunitenses, tantu chi est oservadu a manera atenta e isetadu dae sos operadores finantziàrios e dae sos ambientes borsìsticos istatunitenses e internatzionales.

Sas cumpangias de cummèrziu mannas costumant a ofèrrere pro custa ocasione promotziones desempladas e matucas a tales chi sas bèndidas siant ismanniadas: pro custa cajone intro sas persones chi còmporant sa die de su Chenàbura Nieddu, in medas colant su note foras dae sa butega in ue cheret leare cosa isetende chi abèrgiat a s’incras.

In su 2013 in sos Istados Unidos aiant gastadu 57,4 miliardos de dollaros in una die ebbia in 80 miliones de persones: pro ofèrrere unu paragone est comente si sa popolatzione intrea de sa Germània esseret andada a comporare in sa matessi die.

Su Chenàbura Nieddu costumat a èssere postu in fatu dae su Lunis Digitale, su primu lunis imbeniente, piessinadu dae iscontos mannos chi atenent a produtos de eletrònica: est sa resposta de su cummèrtziu eletrònicu a su chenàbura nieddu e est piessinadu dae un’oferta massissa de prejos abassados a manera esclusiva in linia.

Pro unos cantos, s’espressada Chenàbura Nieddu est naschida in Filadelfia e protzedit dae su tràficu mannu de vituras chi si istèndiat pro s’ocasione, cussas dies.

Dae in ue protzedit non s’ischit però cun seguresa: a bisu de argunos, difatis, diat fàghere riferimentu a sos annotos in sos libros contàbiles de cummertziantes chi, a manera traditzionale, colaiant dae su colore ruju (pèrdidas) a su colore nieddu (balàngios), e duncas su Chenàbura Nieddu diat èssere una die de balàngios mannos pro sas atividades commertziales.

Dae custu momentu diat comintzare su periodu de s’annu prus profetosu pro sos bendidores capatzos de bortare in nieddu, duncas in ativu, sos contos de sas siendas commertziales.

In su 1924, sa die imbeniente a su Ringratziamentu, sa cumpangia de distributzione Macy’s organizeit sa prima parada pro tzelebrare su comintzu de sas còmporas de sas Pascas de Nadale, ma petzi in sos Annos Otanta iscopieit su Chenàbura Nieddu in sos Istados Unidos e a dies de oe est populare finas in àteros paisos che a su Brasile, Rennu Unidu, Germània, Frantza e Ispagna e est orami isparghinadu meda in totu sos giassos de cummèrtziu eletrònicu prus famados

In Itàlia su fenòmenu est atremenadu intro sas promotziones web, ca no esistit una Die de su Ringratziamentu chi imbitzat custa usàntzia, e si averguat unu nùmeru de adesiones meda prus bàsciu a sos àteros mercados digitales europeos.

*leadu da sa pagina de Wikipedia