(Per leggere l’articolo in italiano cliccare sulla bandierina in alto e selezionare quella tricolore)

In is dies coladas unas cantas redatziones giornalistas continentales si sunt interessadas a is movimentos indipendentistas de sa terra nostra. In capas finas e ca s’atualidade de sa sèbera catalana pro s’indipendèntzia fiat sa noa prus dibàtida.
E gasi su fatu chi ùndighi “indianigheddos – partidos indipendentistas” s’esserent addobiados in Bauladu pro resonare e si pònnere paris pro otènnere cudda unione semper pedida ma mai otènnida s’at furriadu in sa noa.
A cussu addòbiu fartaiat su Psd’az. Partidu istòricu e giughidore de fainas autonomistas antis e indipendentistas oe. A is militantes de cussu partidu mi chèrgio inderetare, ammentende un’iscritu betzu de Bellieni (1922) pro chi dae cussos faeddos nde boghent ghetu a seberare is fainas de su benidore issoro.
“Chimbanta mìgia fìgios de s’ìsula ispèrdida in mesu de mare s’imprassant inghìriu a s’arba bandera rugrada de ruju, cun is bator moros a ogros tupados, chi aiat istadu sìmbulu de aunida e de cuncòrdia pro is babbos nostros. A bos ammentades? Fìamus a penas una chentina a incumintzu de su 1919; truma de nostàlgicos e veteranos pregiados de sa gherra, chi aiat bisòngiu de un’atera missione de sacrifìtziu pro istimare torra a nou sa vida.
Como bidimus su bisu nostru si furriare bia, realidade cumprida, bidimus a chentinas is amministratziones comunales ganadas dae pastores e massajos nostros, poderosos grupos de amigos nostros batalliende in mala manera contra sa truma de Cocco Ortu in Casteddu, e apoderende·si de s’amministratzione pro nde fàghere aina de fainas fecundas in cussa de Tàtari.
Amigos de su Partidu Sardu!
Sardistas de is treghentos chimbanta biddas,
Est a boisàteros chi nos inderetamus, a boisàteros chi seis giai istados sa fortza prus firma e mitza de energias e de fede, a boisàteros chi istrintos in is fileras nostras nd’ais pesadu cudda organizatzione sindacale ispantosa de cooperativas pro chie a coitu at a èssere realidade sa cuntziliada de su capitale e de su traballu; a boisàteros nos aboghinamus: lòmpida est un’atera borta s’iscuta de batalliare. A coitu sunt is eletziones.
Su duendu minetzosu de is Partidos Italianos si nde pesat in chelu de Sardigna, sìmile a un’antiga bisura de sa freba, dominadora de is pranos lotzinosos, de is montes àrridos nostros. Issos cherent atoscare s’ànima de sa Giovine Sardigna, cherent imbrutare sa bandera nostra, cherent reduire su pòpulu sardu a una truma de orbetadores e bàrdias regias, nde cherent istratzare su coro biu pro dd’oferrere, in regalu, a su guvernu italianu, chi pensamentosu sighit, addua su mare, canto acontesset in s’ìsula.
In nùmene de sa passione seculare nostra, in nùmene de su calvàriu de sa Brigata Tatari chi at istadu cumpridura de is ispìritos nostros e in s’angùstia de is corpus ischimus torrare a agatare sa fortza pro nos rebellare. Cherimus chi s’ìsula nostra siat cunsiderada, respetada e non miseràbile Chinisedda. Cherimus chi siant lassadas lìberas is bias pro ismanniare is energias nostras de produtzione e iscàmbiu, nos cherimus guvernare sena de tutelas addua su mare. Cherimus chi is italianos cumprendant chi feti cun su programma nostru de auto-guvernu podimus fraigare una Sardigna prus bia e sestada segundu is traditziones nostras.
Non cherimus essere in cussa Itàlia burocràtica, atzentradora, isfrutadora chi nois sardistas disconnoschimus e chi amus s’intentu de nd’isciusciare.
Camillo Bellieni
In s’ora chi fia iscriende pensaia a sa copia Pigliaru-Paci chi in is corridòrios de su Ministèriu de Economia addobiaiant a unu de is suta-segretàrios pro pedire s’iscontu subra is acantonamentos, a pustis de totu su dannu dae issos etotu cumpridu. Ddoe diat àere de non ddus fàghere torrare prus in s’ìsula. Birgòngia!!