(Per leggere l’articolo in italiano cliccare sulla bandierina in alto)

Cun sa bèndida de sa SBS de Arborea a Bonifiche Ferraresi sa Regione at incassiadu 9 milliones e mesu de euros.

Cun 9 milliones e mesu si podet pagare una die de sanidade sarda, chi costat tres milliardos a s’annu.
Custa si annanghet a cudda pagada cun sa bèndida de s’aereoportu de s’Alighera a sos italianos de sa F2i pro 9 milliones e seschentamìgia euros.

Duncas cun custa semus giai a duas dies pagadas.

Megius duas chi non nudda, o nono?

Como sunt chirchende, a sa disisperada, de bèndere sa sienda istòrica de Surigheddu, chi in su mese de làmpadas Libe.r.u. ocupeit pro fàghere connòschere cussu inghèniu metzanu a s’opinione pùblica.

Su prètziu prevìdidu fiat unos 12 milliones de euros: prus o mancu cantu costat una die e carchi ora de sanidade.

E duncas cun Surigheddu lompimus a pagare tres dies.

Bene meda, nde mancant ebbia 362 pro acumprire a unu annu e posca si torrat a cumintzu.

Sa Sardigna intrea est bèndida a istracu baratu dae sa giunta Pigliaru pro acabidare pagos minudos chi, paris a sos totu sos prèstidos cuncordados cun s’istadu, serbint pro pagare una sanidade sena perunu sestu, in ue mancant su personale e fintzas sas mantas ma si permitit de pagare sos amministradores foristeris fintzas in prus de sa mèdia italiana.

Cando como pagas dies sa ministra Lorenzin b’at dadu atentu a cara a totus, ma su delegadu coloniale Pigliaru l’at respostu chi “fartaiat” a faeddare male de sos istipèndios tropu artos.

No isco a ue creet de lòmpere cun custa manera de fàghere iscarada, trampistende die fatu a die e bendende sas prendas de domo, ma una cosa est segura: in antis chi nche esseret issu sa terra e s’aereoportu fiant de propiedade de su pòpulu sardu intamen como sunt de siendas italianas.

E su dinari chi nd’at bogadu serbit pro pagare sos amministradores italianos.

Comente presidente non balet meda, ma a su ruolu de delegadu coloniale acumprit chi est unu ispantu.