Finas a como non b’at una comunicatzione ufitziale de sa Regione Sardigna e tando isetamus una cunfirma istitutzonale pro espressare unu giudìtziu cumpletu.

De seguru, bidende su chi iscrìet oe s’imprenta, sa vertèntzia intre Regione Sardigna e Bonifiche Ferraresi paret chi siat acumprida in bonu.

Sa nova chi nos acunortat est sa sistematzione presunta, in cabu a su comporadore, de sas 26 unidades lavorativas chi no ischiant ite fine depiant fàghere.

Comente Sìndigos de s’Unione de sas Comunas de sa cussòrgia de Terraba nos semus prus de una borta arrecumandados cun sa Giunta regionale a tales chi esseret dada garantzia de istabilizatzione a totus sos traballadores de sa Sotziedade Bonìficas Sardas.

Como, semper bidende su chi iscriet s’imprenta, custu arribu de primore est istadu lòmpidu e s’isperat a manera forte chi sos operàjos agatent ocupatzione in custu territòriu. Amus a sighire sa vertèntzia e amus a èssere a su costàgiu de sos trabaladores pro los agiuare segundu custu arresonu.

Diferente est su discursu ligadu cunforma a sa serrada de sa vertèntzia SBS in relata a su passàgiu de propriedade de su patrimòniu aziendale. Sa Regione at acumpridu una tratativa longa longa e cumplicada, sende chi s’est finas sighida a primìtzios una solutzione totu interna chi prevediat s’achirimentu de sos terrinos dae banda de su compartu agro zootècnicu locale.

Diat èssere istada una congruida de preferire, ma sas cosas sunt andadas a manera diferente. Comente amministratzione comunale, nos auguramus chi sa Regione, in fase de tratativa cun Bonifiche Ferraresi, apat arrangiadu sa chistione cun sas precautziones pretzisas pro fàghere a manera chi si nche movat una polìtica de diàlogu e collaboratzione e non una bìnchida de pare intre sos operadores de su territòriu.

In fines, sas relatas imbenientes cun sa Regione Sardigna.

S’amministratzione regionale at ischitidu su dèpidu chi carrigaiat su bilantzu de sa SBS, ma abarrat a manera cumpleta in coddos de sa Comuna de Arborea su pesu de sas polìticas de disacatu istendiadas in sos ùrtimos deghennios dae sa Sotziedade Bonìficas Sardas, sotziedade partetzipada a su 99% dae sa Regione Sardigna.

Assempru ùrtimu, su fatu chi s’est trigadu pro s’acumprimentu de su caminu 3 chi sos traballos sunt istados firmos pro paritzos annos pro more de unu cunflitu de cumpetèntzias, faghende andare sa Comuna de Arborea a dae in antis de su Tar e cajonende paritzas dificultades.

Sa càusa l’at binta sa Comuna, ma sos tempos si nche sunt illonghiados e petzi a dies de oe, colados sos annos, su caminu est belle che acabadu. S’istòria reghente de Arborea est prena de ritardos e istrobbos burocràticos de cada genia.

In prus, nos dimandamus si sas pendèntzias tributàrias cumpridas dae sa Sotziedade in sos annos cun sa Comuna de Arborea siant incluidas in sos dèpidos postos in sos 9,6 miliones de èuros ogetu de licuidatzione.

In su mentres, a cajone de un’intritzu de cumpetèntzias urbanìsticas, sa viabilidade est a tretu de èssere in disacatu totale e non b’at dinare pro nche ghetare una manu a manera istruturale.

Pro custa resone, amus a presentare custas dies imbenientes a sa Regione Sardigna una relatzione, pro pedire, intro sas àteras cosas, unu pianu istarordinàriu pro sa viabilidade locale e sos traballos de annoamentu de sa Villa de su Presidente SBS.

Cun custu sentidu, isetamus chi su Presidente Pigliaru bèngiat a nos fàghere bisita, gasi comente promìtidu is sos meses colados e si nde seret de sas conditziones de su patrimòniu SBS, chi est decadente e abbandonadu.

Bonifiche Ferraresi at a pagare sos dèpidos a sa Regione.

Chie at a pagare su dèpidu istòricu chi at bajuladu Arborea?