Custu est su giassu in limba Sarda.
Per leggere l’articolo in italiano, clicca sulla bandiera in alto, scegliendo l’opzione del tricolore.
++ Su testu in sardu arribat luego ++
Custu est su giassu in limba Sarda.
Per leggere l’articolo in italiano, clicca sulla bandiera in alto, scegliendo l’opzione del tricolore.
++ Su testu in sardu arribat luego ++
10, 100, 1000 come Francesco Casula….
Frantzí, “Voglio sperarlo”?! Isperaus chi cust’apocalisse e catàstrofe no si averet mai! In cosas deasi dhue at solu de isperare de nos’ibballiare mesu mesu e fàere de totu e sèmpere a manera chi no siat mai!
A nàrrere chi cundivido su chi as iscritu est pagu, ca calecuna cosa dh’ia a aciúnghere, e mancari ias fatu méngius si ias arrispostu in sardu, po no nosi identificare ancora cun is “dimónios” niedhos, ca s’ollollaesu tuo giai est bellu e bonu che a totu su sardu po chie bolet cumprèndhere.
Ma una cosa dha depo própriu nàrrere.
A pònnere apare su PdS (Partito dei Sardi) cun su PSd’Az. po istória, ideales e pràtiga tocat a tènnere unu bellu pagu de ‘coràgiu’!!!
E, a propósitu de su PdS, de parte de is indipendhentistas, si fui geo ia méngius a cricare de fàere mea culpa e lassare pèrdere presuntziones de “purezza”, “verginità”, “limpidezza” o “manipulite” de “manintasca” e àteras, e mancari fintzes calecuna tírria personale.
Mi arresurtat chi su PdS no si est candhidau a su Parlamentu italianu comente, invece, in manera assurda e isconclusionada, ant fatu totu cussos de “Autodeterminatzione” sighindho a cufúndhere s’isperàntzia cun s’ibertu in debbadas, sighindho a abbruxare sa fide in noso etotu fuliandhochedha in su termovalorizadore Parlamentu italianu e illargandho s’autostrada a is partios italianos!
E iscusent totu si “Carrabbusu/carrammerda” docet!!! (E – en passant – mi permito de nàrrere chi símbulu prus sciagurato – peus puru ca no est postu de malesaura – no si ndhe podiat immaginare!)
Is partios italianos (chi de a sèmpere pinnigant su votu “utile” a issos e dannosu a noso) in Sardigna funt de isconciare innanti chi sigant a isconciare sa Sardigna! E no est chi is indipendhentistas “vergini” dhu potzant fàere a decretu. Provaedhoe, tandho, po lòmpere a su comente!
Certu, sa cosa de fàere chentza farta peruna est, no su fratzionismu iscunsiderau ‘indipendhentista’, ma s’unione de totu s’ala natzionalitària indipendhentista de is Sardos, cun istima, arrispetu, e aprétziu po su chi dhu’est de apretziare, e bona volontade po fàere unione no duos meses, ne duos annos innanti de votatziones ma coment’e manera normale, ordinària de su èssere sardos políticos puru creschendho in cusciéntzia e capacidades, firmesa e contivígiu.
Sa tírria cun Paulu Maninchedda si crichet méngius de che dha fuliare cun s’àliga a su muntonàrgiu, ca no seus mancu cricandho ammoradores po chistiones íntimas personales ma su bene de sa natzione sarda. E no dhu natzo ca a Maninchedda mi dhu credo “immaculau”. E a personas che a Mauro Pili, fintzes si no est immaculau, candho si presentat a calecuna manifestatzione contr’a is bases militares, is súrbios che dhos ingurtant e no ndhe boghent, ca funt deunudotu súrbios macos e no mancu su mínimu de aprétziu chi si podet fàere.
O noso seus sèmpere ibertandho immaculadas/immaculaos che a Nostra Segnora po ndhe candhidare a guvernare sa Sardigna? No portaus ogos, o no nosi giaet coro, o nosi faet umbra a bíere cambiamentu inue cambiamentu abberu dhue at? E apo foedhau de duas personas chi mancu apo mai votau!
Ma si agatais una nostrasegnora immaculada, de candhidare a su Parlamentu italianu insistindho andhandho a sa bandha contrària de sa chi est sa filada nosta de pópulu dominau in sa filada de sa libbertade colletiva/indipendhéntzia/responsabbilidade personale e colletiva, a Nostra Segnora dh’impromito (no apo bisóngiu de si dhu giurare) chi NO dha voto po dha mandhare in parte nosta a su Parlamentu italianu: personalmente apo acabbau giai de bàtoro legisladuras de ndhe votare po dhos mandhare a su corru de sa furca de s’impicu nostu e torracontu de sa buteghedha issoro o solu personale. Est de su 1980, candho depia intrare in ruolu po trebballare che persona civile in logu nostu, chi apo arrefudau de giurare fedeltade a sa Repúbblica italiana e fedeltade a sa Sardigna nosta iscaminada, mancari fintzes is manos mias siant pagu límpias.
Is cosas de segare e isconciare no bolent limadas: tocat a che dhas segare e isconciare!
Depeus coltivare gente àbbile e onesta, cun capacidade professionale, unia, determinada e firma chi iscat inue e comente pònnere is manos, in s’economia e in s’amministratzione, e chentza fàere is machiores de chie nos’at annestrau e allenau a is ispantos suos in s’iscola e in sa pràtiga de sa dipendhéntzia. Is Sardos nos’aus a iscabbúllere in àtera manera, no cun is armas de su buginu.
Sa disubbidiéntzia civile istitutzionale de is Sardos depet pònnere in crisi s’Itàlia e is partios suos in Sardigna, fàere ischidare fintzes is dormios e disisperaos e coltivare sa libbertade costrutiva de sa responsabbilidade personale e colletiva de is Sardos.
Calecuna die como calecunu at iscritu de “dimissioni di massa” de is Síndhigos sardos. Dimissiones? Che at colau trint’annos, de candho apo tentu un’isperiéntzia de amministradore, chi biendho comente fut sa ‘autonomia’ de s’amministratzione pentzaia chi prus de unu Síndhigu si fut pótziu dimítere e nàrrere a s’Istadu italianu “Custa comuna amministradidha tue po is bisòngios tuos”. E su Guvernu de sa Repúbblica dhu iat a fàere puru, tanti su Cummissàriu suo giai dhu faet pagare a noso po is bisòngios suos.
Ma poite, is Síndhigos, a si dimítere? Po nos’iscúdere sa marra a peis de manu nosta etotu?!
Mi domandho, oe, invece: Ite depent tímere is Síndhigos a che cuare sa “fascia” e sa “bandhera” tricolore? Iat a èssere unu invalidare/annullare su votu demogràticu de sa gente chi dhos at autorizaos a fàere su síndhigu?
Comente mi dimandho poite is Cossigeris regionales, intrandho in funtzione, depent tímere de giurare fedeltade a sa Natzione sarda e arrefudare de fàere giuramentu de fedeltade a sa Repúbblica italiana?! O funt ‘dimónios sassarinos’ issos puru?
Sa gente dhos at votaos po guvernare sa Sardigna, is Sardos, no s’Itàlia!!!
Ite depent tímere is campiones de sa política sarda, chi arrefudandho de giurare iant a invalidare/annullare su votu demogràticu de is Sardos? At a èssere una demogratzia fascista s’Itàlia Repúbblica italiana puru?
Su Cossígiu regionale de Via Roma in Castedhu iat a pòdere cumenciare a cambiare númene a Parlamentu sardu e funtzione civile de libbertade e responsabbilidade in sa terra nosta chentza prus nosi cuare in buciaca de s’Itàlia, èssere in Europa e in su mundhu cun sa cara nosta. E fintzes cambiare via, de Roma a Cursu indipendhéntzia e Largo Carlo Feroce a Largu Giommaria Angioi o Marianu IV de Arborea.