(Per leggere l’articolo in italiano cliccare sulla bandierina in alto e selezionare quella tricolore)

Comente sìndigos espressamus, in unu documentu a voluntade bona de pare, sa solidariedade nostra a su pòpulu catalanu in pelea pro sa libertade.

“Nois, sìndigos de Bauladu, Iscanu, Biddanoa de Forru e Soramanna cherimus manifestare totu su pistighìngiu nostru pro su chi est capitende in custas oras in Catalunya e sa prossimidade nostra a su pòpulu catalanu.

Connoschimus sa natura istitutzionale de sa funtzione nostra, gasi comente la connoschent sos alcaldes catalanos. Ma creimus chi subra de sa lege ordinària bi siant sos printzìpios de su deretu internatzionale: intre cussos, reconnotu dae totus, su deretu de onni pòpulu a si dare un’Istadu suo e a seberare su guvernu suo.

Creimus chi nudda de su chi càpitat in su mundu nche siat a tesu dae sas biddas nostras, pro cantu minores e a largu nche siant. Semus sighende cun atentu mannu su chi est capitende in Catalunya e nos est pretzisu de fàghere intèndere in propòsitu sa boghe nostra.

Isperamus a beru chi su guvernu tzentrale de Madrid torret in segus e diat sa possibilidade a su pòpulu catalanu de manifestare sa voluntade sua: chi su referendum pro s’indipendèntzia catalana si fatzat e chi totus, binchidores e perdidores, atzetent su chi nd’at a essire. Si custu no at a capitare, sa prima derruta at a èssere pro sa democratzia, in nùmene de sa cale nois puru faghimus su dovere nostru de sìndigos. Peruna violèntzia est benebènnida e peruna violèntzia cheret fata. Custa est s’Europa nostra, e in s’Europa nostra peruna pantasma de su tempus coladu devet torrare.

Seguros chi ant a èssere meda sos amministradores locales sardos chi s’ant a aunire a custa cramada e in sa voluntade de èssere a sa parte de su pòpulu nostru e de su catalanu,

Su sìndigu de Bauladu
(Dàvide Corriga Sanna)

Su sìndigu de Iscanu
(Antoni Flore Motzo)

Su sìndigu de Biddanoa de Forru
(Maurìtziu Onnis)

Su sìndigu de Soramanna
(Marcu Sideri)