In biàgiu cun is libros intre Sardigna e Catalugna, pro torrare a is ligàmenes antigos intre is duas terras e pro fàghere torrare a partire s’editoria sarda in Ispagna. Su 23 de Abrile, in Bartzellona, si festat “Santu Giorgi”, sa Festa de sos innamorados e sa Die mundiale de su Libru. Custu su progetu de is ambasciadores culturales de Sardigna.
Est sa Festa de is Libros, de sas Rosas e de s’Amore. Sa festa de is innamorados e de totus is chi no agabbant mai de si istimare. Su 23 Abrile, in Bartzellona si festat Santu Giorgi, su Santu Balentinu de sa Catalugna. Sa paristòria contat de unu dragu chi pro more de unu fàmene bentranu, ispantaiat sa populatzione; petzi gràtzias a Santu Giorgi, su cavalleri chi l’ochieit sarvende sa printzipessa amada, si sa tzitade torreit a si pintare de frores, rujos che a su sàmbene de su mostru timidu. Una die ispetziale, cun milli e milli persones chi essint in sas carreras pro s’atopare e festare: is òmines donant fiotos de rosas a is fèminas, e is fèminas ddis torrant regalende libros. Una festa meda populare, chi naschet intro a sa traditzione seculare de sa cultura catalana, e ànimat is ramblas cun bancarellas a chentinaias e unu muntone de eventos, reading, performance e atòbios literàrios. A su chi narant is datos de s’assòtziu Editores Catalanos, is bèndidas de libros petzi in sa die de Santu Giorgi balent su 10 pro chentu de is bèndidas de totu s’annu, cunfirmende, una editzione in fatu a s’àtera, una resèssida mediàtica chi non si podet contare. In su 2012 fintzas sa Sardigna at seberadu de partetzipare a cussa die chi fatu fatu s’est afirmada che a sa Die de su Libru (Sa die mundiale de su libru e de su deretu d’autore proclamada dae s’Unesco). S’Assòtziu Culturale Samedì, sighende su progetu “Una nave di libri” ammaniadu dae sa rivista “Leggere tutti” e dae sa sotziedade de navigatzione Grimaldi organizat, dae su 22 a su 26 de Abrile, cun partèntzia dae Portu Turre e arrivu a su portu de Bartzellona, sa partetzipatzione de sa Sardigna a sa traessada de chimbe dies cun su tìtulu “Sa Sardigna isbarcat in Bartzellona”.
Sa novidade de custa originale navigatzione literària, patrotzinada pro s’editzione 2017 dae sa Fundatzione de Sardigna, est pensada massimamente pro sas iscolas isulanas e bolet ofèrrere a dischentes e maistros unu biàgiu chi ponet a pare s’ispàssiu cun su imparu e s’alternàntzia iscola-traballu, cun presentadas de libros, workshop, ispetàculos de mùsica e teatru, laboratòrios de màndigu, supra su binu e temas ambientales. Unu grupu mannu de ambasciadores culturales de sa Sardigna (in ue s’agatant espertos de su mundu de s’arte, chef famados e operadores culturales, registas e giornalistas) cussentes de s’importàntzia de una cultura cumpartzida dae prus de bator sèculos intre Ispagna e Sardigna, pigat in sa nae e si ponet a traballare pro fàghere connòschere is sìngulas ispetzifitzidades linguìsticas de una e de s’àtera terra. S’importàntzia de custu eventu est bene cunfirmada dae s’adesione a su progetu de medas istitutziones e assòtzios che a s’Institut Ramon Llull, sa Generalitat Catalana, s’Istitutu Italianu de Cultura, sa Fundatzione Meta de s’Alighera, su Parco de Porto Conte, sa “Casa degli italiani”, su Tzìrculu de is sardos de Bartzellona e su Coordinamentu Sardu Ufitziale.
Supra su ponte de sa Cruise Roma de sa Grimaldi, durante sa traessada (e in is dies de permanèntzia in Bartzellona) no sceti unu poderosu programma de leturas cun is autores (a banda sos iscritores Nadia Terranova, Caterina Fiorello, Fabrizio Demaria, Roberto Riccardi, Vittorio Russo è prevista la partecipazione degli autori sardi Livy Former, Giorgio Pellegrini, Vindice Lecis, Laura Marcellino, Giuseppe Corongiu, Giovanni Follesa, Davide Casu, Maria Antonietta Piga) ma finas show-case, mustras fotogràficas, interventos de registas e projetziones tzinematogràficas. Fintzas logu pro s’anteprima de unu progetu editoriale-discogràficu, firmadu dae sa Thorn&Sun Communication, dedicadu a su artista eclèticu Davide Casu (musitzista, poeta e pintore aligheresu) e logu finas pro meda letziones de coghina a tema de su raportu intre màndigu, traditziones e cultura a incuru de Giovanni Fancello, gourmet e istudiosu de arte culinària sarda. Isbarcados a Bartzellona is passigeris ant a èssere protagonistas de sa “Bidda de sa Cultura” postu in su coro de is ramblas e epitzentru de sa manifestatzione. Durante totu sa festa de Santu Giorgi sa “bidda” s’at a trasformare in unu palcoscènicu privilegiadu in ue si gosare de ispetàculos, atòbios literàrios e tastamentos de produtos tìpicos, in ue at a sighire unu cunvegnu subra sa limba sarda posta a cunfrontu cun sa situatzione linguìstica catalana.
Chimbe dies prenas de apuntamentos e temas culturales, duncas, chi bolent pònnere raighinas e isvilupare in su territòriu catalanu e ispanniolu sa promotzione de sa Sardigna in tema turìsticu – culturale. Sa manifestatzione punnat difatis a fàghere intrare s’Ìsula in su tzircùitu de su panorama mediàticu internatzionale, promovende·la intro a eventos internatzionales dedicados a s’editoria pro sa promotzione de is òperas de autores e editores sardos. In s’Alighera, in cussas dies etotu, s’at a ativare sa collaboratzione cun su Dia de su libru de s’Alighera e in su mentres in Casteddu b’at a èssere sa serada finale de sa manifestatzione cun sa partetzipatzione de totus is dischentes e dotzentes chi ant partetzipadu a su biàgiu.