Custu est su giassu in limba Sarda.

Per leggere l’articolo in italiano, clicca sulla bandiera in alto, scegliendo l’opzione del tricolore.

Sa Cummissione decrarat ca cheret arresonare cun su Guvernu italianu, ma verba volant, scripta manent.
Si resonu cherimus a beru, e nois ddu cherimus, tocat a partire dae su cuntrestu nòbile pronuntziadu dae su Presidente Mattarella in Isvètzia, dae cussa chi podimus cunsiderare comente a sa trona de sos prèmios Nobel, incluidu cussu pro sa paghe.
Sa pregunta est: cale risposta depet donare Itàlia a una ruta noa de su creschimentu, giai malu, e a unu disimpreu e poberesa chi no si podent sustennere?
Sa risposta implìtzita dae parte de sos cunservadores de una Europa chi no cumprit totu sas tareas cuncordadas est “neghe de boisàteros chi non ais fatu sas reformas chi aìamus dimandadu”, innoriende ca sos destinatàrios polìticos no sunt prus cuddos a chie aiant adderetadu sos pedidos e cun chie aiant istèrridu acòrdios.
S’Istadu, seguru est responsàbile de su respetu dèpidu a sos aficos internatzionales dae chie si siat leados, ma su puntu de partèntzia de s’arresonamentu depet abarrare sa chistione chi su guvernu presente nd’at pesadu: “e ite faghere pro cuntrastare sa ruta de su Pib, ca Itàlia feti tenet sa responsabilidade de si faghere agatare in istadu de debilesa perenne, e pro acarare sos perìgulos graes de s’aumentu de disimpreu e poberesa?”
Sa possibilidade de nde podere arresonare dd’aiat giai inditada su Guvernu italianu in su mese de cabudanni cun su documentu a tìtulu “Una politeia pro una Europa diferente, prus forte e prus giusta”.
Su documentu proponet de costituire in Brussellas unu Grupu de Traballu de artu livellu chi imbiet su messàgiu a sos tzitadinos europeos chi s’Unione est ispriculende sas maneras pro cumprire s’istrutura e sas polìticas europeas, chi nde boghet unos cantos lìmites a sos negotziados in chistione incarrerados a totoe. Chie sighit a repitere ca su Guvernu persighit s’intentu de nche imbiare s’Itàlia foras dae s’èuro e dae s’unione Europea at s’isperu chi sa situatzione andet peus pro chircare de recuperare sa derruta de su 4 de martzu e s’apellat a su mercadu pro nde pesare àteros cancalleos, sena donare risposta a sos tres problemas inditados.
Sa solutzione a s’atapada, chi faghiat a evitare, passat peri una sèbera chi sarvet sa cara de ogni parte in càusa: cussa de su Guvernu, chi at inditadu unu caminu pro acarare sos tres problemas (ruta de su creschimentu, disimpreu e poberesa), cumbidende a s’arresonu peri cussu chi amus inditadu comente Grupu de livellu artu; cussa de sa Cummissione chi diat èssere dèpidu aberrere s’arresonamentu in manera diferente dae cuddu simple “respetade sos paràmetros fiscales”; e cudda de sos àteros istados membros chi disconnoschent su problema de acarare.
Unu verba volant est ca diant èssere unos cantu sos istados membros a non chèrrere perunu arresonu e, duncas, no ddoe diat èssere possibilidade pro sa Cummissione de incumentzare s”arresonamentu propostu. Sos Paisos Bassos e s’Àustria s’ant espressadu in favore de una protzedura de infratzione; si sos primos esserent acumpangiadu su pedidu cun s’aficu de nde boddire su subraprus ispantosu de bilantzia currente chi nde leat possibilidade de creschimentu a s’Unione, e si s’Àustria esseret tentu, assora, prus selembru in su rolu istitutzionale suo cando dd’at tocadu su turnu de Presidèntzia de s’Ue, in capas s’arresonamentu diant èssere favorèssidu.
S’arresonamentu faghet a ddu incumentzare in formas diferentes, ùtiles e ratzionales, comente a cussu incaminadu dae sa bona e passentziosa collega frantzesa Loiseau chi in sa risposta sua a su documentu de su Guvernu m’at inditadu sos puntos subra sos chi si diat podere arresonare. Garbu sìmile, a sa matessi manera apretziadu, m’ant riservadu àteros collegas europeos.
Àteros, cumpresu su Presidente Junker, s’ant serradu in unu mudimine chi no chèrgio cunsiderare comente a farta de voluntade pro arresonare de sos problemas a beru de s’Unione.
Ca totus decrarant de chèrrere s’Europa unida sa bia podet èssere feti cussa inditada dae su Presidente Mattarella in s’ora de bisitare Isvètzia: arresonare e isprobigare s’ispìritu de Europa.
Itàlia cheret arresonare. A sos àteros mustrare ca in sèriu si nde cherent incurare de su benidore de s’Unione Europea.

*litera aberta publicada in “Il Sole 24 Ore” essidu oe.