Custu est su giassu in limba Sarda.

Per leggere l’articolo in italiano, clicca sulla bandiera in alto, scegliendo l’opzione del tricolore.

Sa magistradura (investigadora e giuigadora) est un’òrganu de garantzia democràtica. Puntu.
Sende formada dae òmines e feminas, comente a cale si siat àteru òrganu de garantzia democràtica, a bortas podet faddire. Utalabì. Puntu.
Mancare sa possibilidade de faddire, pro assegurare sa sighida de sa dibata democràtica, addua de sos parres nostros e finas de sos tortos chi semus cumbintos de aguantare (o de àere aguantadu), no faghet a nde ddi leare legitimidade. Puntu.
Custas tres fràsias sunt àteros tantu fundamentos, chi dae semper pòngio a ghiare sa filosofia mea de vida. E comente a conseguèntzia, de sa visione mea e anàlisi de sos fatos chi acontessent.
E subra custos fundamentos si raighinat finas su resonamentu chi so isterrende.
Apo chircadu de lèghere ogni paperi a disponimentu – mi nde abbìgio ca sunt pagos in capas – respetu a s’ordinàntzia de mesura restritiva chi unu Gip calabresu – in segus a dimanda de su Pm de sa Procura de Locri – nd’at bogadu in sos cunfrontos de su sìndigu de Riace Mimmo Lucano.
No ddoe apo agatadu perunu de sos elementos chi m’aiant èssere adderetadu a mudare de parre subra issu: no ddoe at arrastu de apoderamentu no dèpidu, no ddoe at arrastu de arrichimentu personale, no ddoe at arrastu de trampas cun sos grupos de afàrios chi ispeculitant in coddu a emigrantes e dèbiles, no ddoe at arrastu de màfia.
Custu a ogos meos, costituit chistione chi truncat.
Mimmo Lucano – a canto nd’isco – est arrestadu in domo pro àere, a parre de sas ipòtesis de sos investigadores, abusadu de una o prus leges de s’Istadu pro contu de àteros. Est a narrere, a bisu meu, pro risolvere sos problemas de sas persones in dificultade, chi istant male, chi sunt pòberas, chi arriscant de no tennere benidore. In summa at fatu su sìndigu. At sighidu una lege morale. A ogos meos – ispero chi nemos iscradeddet – no est nen agravante nen isumidore, su fatu chi sas fainas suas esserent inderetadas a agiudare immigrados nieddos. A ogos meos sa poberesa, sa dificultade, su benidore furadu sunt sena colore.
A ogos meos, Mimmo Lucano est sìmile a cuddos sìndigos de su tzentru Sardigna chi dd’acabbant investigados (unos cantos finas cundennados) ca refudant de firmare un’atu cuncordadu dae una Unidade de missione regionale, pedende a cudda burocratzia polìtica de si nde faghere carrigu de sas responsabilidades suas e de no ddas iscarigare in coddu a chie bivet isuladu in una comunidade in ue àstulas ammachiadas si podent furriare de mala manera.
Est sìmile a cuddos sìndigos chi sunt prontos a aguantare sas santziones tentas in contu pro chie abusat de s’acòrdiu de firmesa, pro frunire servìtzios de fundamentu a sa comunidade sua, in particulare a sa banda prus dèbile e sena amparu.
Dd’agato sìmile finas a cuddos primos tzitadinos chi intentant- cando no sunt punnados dae clientelismu o dae intentu eletorale – a procurare ocasiones de traballu a sos cumpaesanos issoro, ismentigados dae totu e totus.
Cando un’amministradore pùblicu de una làcana estremada (che a Mimmo Lucano in Riace e che a sos sìndigos nostros de cussòrgias internas) arriscat de dd’acabbare in anneos cun sa lege (a s’ispissu surda e tzurpa, a s’ispissu mudada in inùtile dae sos incastros burocràticos) no pro neghe de chistiones acapiadas a s’arrichimentu personale ma ca ponet antis de sa tranchillidade sua cussa de chie sufrit, de chie at istadu ismentigadu, de chie no tenet benidore, a pesare de totu gosat de sa solidariedade mea.
Est pro cussu – si sa premissa at a essere cunfirmada – chi mi decraru in favore de ogni Mimmo Lucano chi s’agatat, sena tènnere in contu su colore de carre de chie nd’at leadu profetu. Aborresso ogni genia de ratzismu: sia cuddu contras a su diversu, siat cuddu (autoratzismu) contras a s’uguale.
S’isperu est chi antis o pustis custa cultura potzat propassare s’istumbada tzurpa tra trumas ideològicas chi dae unos canto meses turmentat a “bonistas” e “malistas”.
Pro bi resessere diat bastare a nos lassare ghiare dae s’umanidade.
Pustis, tzertu, ddoe sunt sas leges. Una cundenna pro aere agiudadu a unu pòberu – sena perunu profetu personale – est una medàllia de mustrare cun artivesa.
Ca, caros sos “malistas” meos de dereta e de manca (garantistas a geometria ballariana), sas cundennas no sunt totu uguales. E su pòpulu ddu cumprendet.