Custu est su giassu in limba Sarda.

Per leggere l’articolo in italiano, clicca sulla bandiera in alto, scegliendo l’opzione del tricolore.

Pro un’avaloramentu giustu de sas sèberas cumpridas dae su Consìgiu de sos ministros tocat a moere dae sas mesuras aprovadas cun s’Annotu de posta a die a su Documentu de Economia e Finantzia 2018. Antis che totu tocat a s’ammentare ca su programma de polìtica econòmica e finantziària de su guvernu est cunforme a su cuntratu de guvernu e a s’atrèmenu parlamentare aprovadu su 19 de su mese de làmpadas coladu, gosi mustradu:
1. in sa burrada de sos aumentos de s’Iva tentos in contu pro su 2019;
2. cun s’introduida de su rèdditu de citadinàntzia, in su matessi tempus de sa reforma e s’afortigada de sos tzentros pro su traballu;
3. in s’introduida de sa pensione de citadinàntzia;
4. in s’introduida de su pensionamentu antitzipadu pro favoressere s’assumida de traballadores giòvanos (propassada de sa lege Fornero);
5. in sa primu fase de s’introduida de su cotizamentu pranu (flat tax) peri s’artziada de su livellu mìnimu pro su regìmene simplificadu de imponimentu subra impresas piticas, professionistas e artesanos;
6. in sa segada de su cotizamentu subra sos ùtiles de impresa (Ires) pro sas siendas chi torrant a investire sos prefetos e assument traballadores in prus;
7. in su recùperu de sos investimentos pùblicos peri s’agiunta de resursas finantziàrias, s’afortigada de sas capatzidades tècnicas de sas amministratziones tzentrales e locales in s’ora de progetare e avalorare sos progetos, e finas prus atùliu in sos protzessos de sèbera in ogni livellu de s’amministratzione pùblica, de sos mudòngios a su Còdighe de sos apaltos e s’uniformada de sos cuntratos de acòrdiu pùblicu-privadu;
8. in unu programma de mantenimentu istraordinàriu de sa retza viària e de collegamentu italiana in segus a sa falada de su ponte Morandi in Gènova, pro su cale, in cunsideru de sas caraterìsticas de ecetzionalidade e urgèntzia de sas fainas programmadas, ddoe at s’intentu de pedire a sa Cummissione europea su reconnoschimentu de bilàntziu flessìbile pro giughere a in antis polìticas de recùperu de sos setores càncaros de s’economia, antis che totu sos maniestos modernos, sas infrastruturas e sos fràigos;
9. in sa bessida de resursas pro s’allèbiu de sos risparmiadores iscalabrados dae sas crisis bancàrias.
Custas ainas persighint s’intentu de prenare su distacu de creschimentu reale de su Pib respetu a su restu de Europa sena dannos a sa firmesa de sos prètzios, a s’imbesse contribuende carrighende subra sos contos pùblicos s’ònere de s’aumentu de s’Iva netzessàriu pro prenare sa punna a ammancu lassada dae su guvernu pretzedente, avaloradu dae su Ministèriu de s’Economia e Finantzia in 1,24 pro chentu, est a narrere prus meda de canto cunsertadu cun sa Cummissione.
Su guvernu at eredadu 5 milliones de pòberos chi teniant giai sèrios bisòngios de subravivèntzia; tra cussos ddoe sunt parte de su 10 pro chentu de traballadores disocupados, tra issos unu nùmeru de giòvanos chi no podimus bajulare. Su rèdditu e sa pensione de citadinàntzia, paris a su pensionamentu antitzipadu persighint s’intentu de illebiare sas dificultades de custa parte de populatzione, gasi comente òbligant sas regulas de cunvivèntzia de una natzione tzivile.
Sa situatzione de creschimentu reale fùrriat in peus a càusa de sos mudòngios in sas cunditziones de cummèrtziu internatzionale dae chie dipendet sa sorte de sas esportatziones nostras, galu oe puntu de fortza de s’economia nostra. Ocannu diamus a depere registrare su creschimentu reale de 1 pro chentu e sas previsiones de cunsensu pro su 2019 sunt in s’òrdine de 1 pro chentu. Si no cherimus una furriada in peus de s’economia e aumentadu de sas cunditziones de poberesa e disimpreu tocat a ponnere in atu fainas noas de polìtica fiscale.
Su mègius diat èssere a nde bogare investimentos massitzos, in s’òrdine de sos rispàrmios in sobradu de sos italianos, paris a unos 50 milliardos de èuros, presentes dae una pariga de annos in s’economia nostra. Tocat a torrare a allughere su motore de s’economia nostra, cussu de sos fràigos, ca s’istudada sua at contribuidu bene bene a sa crisi. Sas cunditziones de cumprida de custos investimentos dd’as ant discuidadas, ponende vìnculos a intro e a foras a sa cumprida issoro. Est giustu pensare ca in su 2019 feti nos lompamus a un’aumentu de sos investimentos paris a su nessi a 1 pro chentu de Pib, e sa metade cun sas fainas de sos tzentros produtivos mannos de deretu privadu in sos cales s’Istadu tenet partecipatziones de importu. Si gasi diat èssere, su pesu subra su disavantzu diat èssere de 0,5 pro chentu, sena tennere contu de sas retzetas fiscales chi custu gastu nou diat assegurare. Pro cussu, in prus de sas mesuras giai inditadas in s’Annotu de posta a die (afortigada de sas capatzidades tècnicas de sas amministratziones tzentrales e locale, prus atùliu de sos protzessos de sèbera in ogni livellu de s’amministratzione pùblica, mudòngios a su Còdighe de sos apaltos e uniformada de sos cuntratos de acòrdiu pùblicu-privadu) ddoe at àere una cabina de regia in Palàtziu Chigi pro intervennere in sos puntos de arrocu o de ritardu.
Sa posta in atu de custas punnas in sa dimanda a cumone, tentu contu de sos multiplicadores de su gastu, podet giughere a unu creschimentu in su 2019 de su 2 pro chentu prus o mancu, e creschere galu de mesu puntu a s’annu, lompende a sorigare cuddu livellu mìnimu de 3 pro chentu netzessàriu pro podere mirare a unu benidore de s’ocupatzione e de sa firmesa finantziària de su Paisu, chi unu creschimentu inghìriu a 1 pro chentu no diat assegurare.
Si sa sustenibilidade de su dèpidu pùblicu italianu dda giugamus segundu sa relatzione tra su dèpidu pùblicu e su Pib, tocat a iscumproare ca cussu s’at a reduire a longu de sos tres annos, datu ca su creschimentu de su Pib a peròmine at a abarrare a manera permanente subra 2,4 pro chentu de sos ammancos de bilàntziu. Custu balet in sa peus de sas ipòtesis, cussa de unu creschimentu fartadu, ma peus puru in s’atopu de resurtare una cumbinatzione de gastos comente inditadu in s’Annotu de posta a die.
Ca su guvernu est formadu dae persone chi cumprendent sos arriscos finantziàrios, ma fragant finas sos perigulosa dèpidos a unu creschimentu in peus, sa posta in atu de su programma de guvernu at a èssere compidada in manera sighida pro averiguare si s’andàina de s’economia e de sa finantzia abarrant coerentes cun sas ainas postas in atu; totu custu incumentzende dae su 31 de su mese de Nadale 2018, galu antis de inghitzare su programma. So seguru ca su mercadu at a avalorare che a positivas sas sèberas cumpridas reconnoschende a su guvernu su profetu de sa ratzionalidade chi alimentat s’ispera de podere mantennere cudda firmesa polìtica chi no si balet prus pagu de cussa de bilàntziu.