Su romanzu de una literadura ‘normale’ in sardu. Totu un’atera cosa dae s’imàgine istereotipada de sos contos  de sa bidda, de sos ammentos identitàrios, de sa realidade de su sartu. S’essida a campu, in sa literadura iscrita in sardu, de sos pistighìngios de s’òmine de oe, de sas peleas de sa vida in tzitade, de sa cumplessidade de sos raportos umanos, de s’erotismu. Sunt, custas, sas novidades prus mannas (pro sa literadura  de sa minoria linguìstica nostra) de su romanzu ‘Sa vida cuada’, iscritu dae su nugoresu Jubanne  Piga e publicadu dae sa sotziedade editoriale Papiros.

Sàbadu 24 de matzu, a sas 17.30, in sa  libreria “La Feltrinelli Point”, in Casteddu in Carrera de  Paoli 19, su Coordinamentu pro su Sardu Ufitziale  proponet sa presentada  de custu libru chi duos annos a como at bintu  su prèmiu literàriu “Casteddu de sa Fae” de Pasada, e como, in fines, si podet agatare in sas librerias. Nde faeddant Giuanna Dessi, operadora culturale e linguìstica, e Pepe Coròngiu, animadore e fundadore de su CSU. Maria Antonietta Piga at a lèghere unos cantos cantos de su libru.

S’assòtziu linguìsticu s’est distintu in custos annos ca at gherradu pro liberare su mundu de sa limba sarda dae sas contraditziones suas, proponende tecnologias noas, traduende unos cantos clàssicos, atualizzende sos temas de s’istandard linguìsticu. S’iscritura de  Piga sighit su surcu de custu bisòngiu de supravivèntzia  de una literadura semper in anneu, comente totu sas literaduras minoritàrias  in Itàlia e in Europa. Fintzas su sèberu de Piga, chi at semper iscritu in nugoresu, de impitare sa  Limba Sarda Comuna, est una cosa de importu e pro nudda iscontada. S’autore, chi at a èssere presente in sa manifestatzione, est nàschidu in Nùgoro in su 1940. At publicadu unas cantas regortas de poesias, comente ‘Su dubbiu de s’anima”. De importu mannu fintzas s’òpera ‘S’andala de su tempus’. At fundadu, animadu e ghiadu medas prèmios de  poesia in Sardigna e mescamente in Barbàgia, sa terra sua. Cun ‘Sa vida cuada’ at dadu un’imprentada manna a s’atividade sua culturale e literària chi durat dae deghinas de annos.