Custu est su giassu in limba Sarda.

Per leggere l’articolo in italiano, clicca sulla bandiera in alto, scegliendo l’opzione del tricolore.

Pro deghinas de annos ant bogadu a pìgiu sa sìndrome NIMBY – Nono in sa corte mea – , pro faeddare de sa contrariedade de sas comunidades locales a fraigare òperas o a cumintzare atividade de “utilidade pùblica”; duncas ant teorizadu pro tempus meda subra de s’egoismu locale chi frenat su progressu.
Como diat èssere tempus de si pregontare si òperas e atividades chi nemos cheret in sa corte sua siant a beru gasi ùtiles e, mescamente, ùtiles a chie, a cales interessos, e cale siat su preju in tèrmines ambientales e de vida de custa “utilidade pùblica”.
Gasi totu, tocat a si pregontare pro ite sas cortes seberadas sunt semper sas matessi e pro ite, si de utilidade pùblica si tratat, non si sèberat una responsabilidade pùblica. Tando, non depimus faeddare de sìndrome NIMBY, ma de resistèntzia legìtima de sas comunidades colonizadas.
Nono a su depòsitu de (àteras) iscòrias nucleares in Sardigna, nono a sas esertzitatziones militares chi imbrutant sa terra nostra e guastant sa salude nostra petzi pro s’addestrare a fàghere cùrrere su sàmbene de àteros pòpulos.