Custu est su giassu in limba Sarda.

Per leggere l’articolo in italiano, clicca sulla bandiera in alto, scegliendo l’opzione del tricolore.

Sa sotziedade chi semus produende est cudda chi is giòvanos nostros càstiant semper de a foras e mai de a intro, in ue si bisat de fuire fatza a un’àtera vida mègius, difìtzile a agatare fintzas in aterue.

Una sotziedade in ue si serrant is iscolas ca costant tropu. Ma faghet a cantificare su valore de sa connoschèntzia, investimentu chi at a dèpere donare is frutos suos a su mancu in 30 annos?

Si serrant is ospedales pro ca nch’est pagu dinari. Faghet a cantificare in dinari su valore de sa salude de una persone?

Si tzentralizant is servìtzios pro risparmiare. Ma faghet a donare unu prètziu a su dannu sotziale, culturale e econòmicu, de s’urbanizatzione induta de populatziones interas chi su cuntzentrant in tzitade?

Si lassant passare is annos a primu de intervènnere pro firmare una isfossonada tenende isoladas populatziones interas, ca sa burocratzia depet esecutare milli cuntrollos chi a sa fine càusant prus dannos de cuddos chi podent prevenire.

Si isperat chi arribent investidores mannos filàntropos pro ddi istèndere tapidos rùbios e licuidare is resursas nostras pro unu arrogu de pane, mentras chi si calincunu de noisàteros nche aiat a bòlere provare diat a agatare milli  barrancos.

Alloddu ite semus lassende a is fìgios nostros. Non semus faghende a bastàntzia. Abarramus a castiare, protestende contras a totus chena de fàghere nudda.

Non ischimus trasformare sa protesta in proposta. Abetamus semper chi calincunu providat.

Cuddu calincunu diamus a èssere nois.