Per leggere l’articolo in italiano, clicca sulla bandiera in alto, scegliendo l’opzione del tricolore.

Unu mese a oe amus saludadu cun galavera su resurtadu eletorale de primore de is fortzas
autonomìsticas corsas, un’esempru de leare pro fraigare una alternativa de guvernu profetosa in
Sardigna puru.

Sa proposta de su fronte ùnicu “Pè a Corsica” at pòdidu leare profetu de annos de ainas cuncretas e
issèberos coragiosos, de truncamentu in totu.

Su progetu est arribadu a sa prova de su guvernu denneghende onni collaboratzione e alleàntzia cun
is movimentos frantzesos, ponende a banda grupigheddos, personalismos e partzimentas ideològicas
farsas, guvernende in s’interesse de su pòpulu e non faghende su tzinnu a is clientelas e a is
carrieras personales.

Custa est s’àndala chi nois puru semus inditende dae meda pro sa Sardigna, sena iscassiadòrgios,
cun seriedade, sena fartas.

Pro cussu nos semus costituidos in su Progetu Autoderminatzione e presentados cramende a
s’arresonu totu is sardos chi si reconnoschent in balores democràticos, ispirados a s solidariedade, a
su guvernu bonu, a sa aunidade sotziale, a acollire, a is ainas profetosas.

A èssere sardos, semper mai, non bastat pro mudare cara a una gestione de sa cosa pùblica chi non
funtzionat e cajonat disparidades sotziales.
Est custu chi cherimus crarire oe a propòsitu de su dibàtidu chi pertocat s’unidade de su mundu chi
càstiat a is balores de s’autodeterminiatzione, de su sovranismu e de s’indipendentismu.
Una unidade chi nos auguramus e chi, finas cun s’esempru de semplificatzione chi pro primos amus
dadu, cherimus favorèssere. Ma sena lassare a còdias sos balores democràticos acapiados a cussos
giai inditados e lacanados e trunchende cun su passadu.
Ponende fatu a s’esempru de is amigos corsos, creimus chi is fundamentos siant cussos giai
inditados.

In antis de totu peruna alleànzia cun is partidos italianos.
E non pro chistiones ètnicas o pro nos acorrare in domo nostra ebbia, ma pro bogare a pìgiu una
classe dirigente e balores noos, chi in is 25 annos de intrèveru de guvernu intre tzentrudereta e
tzentrumanca italianos non sunt mai essidos a campu. Pro ite diat dèpere èssere diferente dae su
2019 e pro sos annos imbenientes?

A pustis sa truncadura. A bastat èssere sardos e nàrrere de èssere alternativos a is partidos italianos
pro pòdere pensare a unu progetu de guvernu comunu, chi siat birtudosu e credìbile?
Nois creimus chi in antis de totu siat netzessàriu a reconnòschere is faddinas mannas e is
inacumprimentos chi in custa legisladura sunt de pònnere in contu a sa Giunta Pigliaru-Paci: dae is
recursos retirados subra is Intradas a sa chistione acantonamentos, dae su pore de mùtuos inchesos e
lassados in eredade a is Giuntas chi ant a bènnere a sa riforma metzana de sa retza ospedaliera, dae
su mancadu cuntrastu a is fenòmenos (in crèschida) de s’emigratzione de is giòvanos nostros e de
s’ispopulamentu de is zonas internas, a is provedimentos-tzapulu e male sestados pro su mundu de
sa campagna e a sa detzisione dannàrgia de fraigare unu bete inchisinadore de àliga in Macumere,
dae sa riforma mancada de su funtzionamentu de sa màchina-regione a su tratòngiu de tzeràchia cun
su guvernu italianu, chi at bidu su presidente Pigliaru aprovende su referendum de is riformas
costitutzionales de su 4 de mese de idas 2016.
Nois pensamus chi, in su rispetu de custos presupostos, in Sardigna bi siat su logu pro fraigare unu
fronte ampru pro s’autoderminatzione.

Semus prontos a nde chistionare cun totus, sena refudos personalìsticos, sena liderismos,
disponìbiles a pònnere a disponimentu de una prataforma comuna su contivìgiu nostru e sa sienda
nostra de ideas, cuntentos de pòdere cumpartzires’eperièntzia e is progetos de àteros sugetos
disponìbiles a crèere in unu benidore prus profetosu pro s’Ìsula nostra.

Pesamus, duncas, s’ispera chi custu apellu nostru nche lu podant collire totu is àteros sugetos de
s’àrea polìtica ampra a is cale est indiritzadu: ponimus a banda is disamistades e malumores (e finas
is ambissiones personales, mancari lìtzitas) e damus a sa Sardigna una alternativa de guvernu
credìbile e autorèvole.