Bidende a su duo P & P (Pigliaru & Paci) andende a Roma a cuntratare cun su Guvernu italianu pro sa “Agentzia Sarda de sas Intradas” m’est bènnidu a conca su film de Camillo Mastrocinque “Totò, Peppino e la malafèmmina”, cando sos duos còmicos napolitanos sunt andados a Milano. In su film sa parte curiosa est cussa in ube Antonio detat a Peppino sa lìtera de imbiare a Marisa, sa pitzinna milanesa “malafèmmina” chi si fiat innamorada de Gianni, fìzu de sa sòrre batia issoro, pro la cumbìnchere a lu lassare, ca timiant chi l’aeret disvortadu dae sos istùdios. Pro rèndere sa lìtera prus minetòria sos duos aiant abbundadu in sa puntegiadura ponende sos famados “duos puntos” a postu de unu.
A bortas sa realidade bàrigat sa fantasia, comente cando su Presidente de sa Regione Sardigna at impunnadu a in antis de sa Corte Costitutzionale sa “Lege de istabilidade 2017”, obberusiat sa Finantziària natzionale italiana, chi prebidet sa pròroga de sos acantonamentos finas a su 2020 pro implementare su fundu sanitàriu natzionale, chi costat a sos Sardos 684 milliones de euro a s’annu. Custu a pustis chi sa Giunta regionale aiat frimmadu s’acordu cun su Guvernu italianu pro retirare sos recursos presentados a sa Corte Costitutzionale pro sos matessi acantonamentos. Sa Badde de Aosta, chi imbetzes aiat sighidu in sos recursos, at bìnchidu e s’at bidu reconnòschidos sos pròpios diritos.
Ma tando benit ispontàneu a nos preguntare: ite ratza de acordu ant frimmadu cun s’Istadu italianu Pigliaru e Paci, si como cherent presentare a sa Corte Costitutzionale sos matessi recursos chi ant retiradu carchi annu a como? No at a èssere chi lis ant mustradu carchi testu e nde lis ant fatu frimmare un’àteru? O chi apant lèghidu carchi lìtera in ube a postu de unu puntu bi nd’aiat duos chi mudaiant totu su sinnificu de sa fràsia, comente in sa lìtera de Totò? E como custos duos rapresentantes istitutzionales nostros cherent abèrrere unu chertu cun su Guvernu italianu pro s’Agentzia Sarda de sas Intradas?
Carchi die a oe Pìgliaru & Paci ant torradu a iscrìere a Maria Elena Boschi (Sutasegretària de Istadu a sa Presidèntzia de su Cossìgiu de sos Ministros), comente Totò & Peppino a sa “malafèmmina”, pro nos fàghere nessi un’iscontu subra custos 684 milliones e nde pagare sa meidade. Ma sa Ministra paret chi a cussa origra non b’intendat e sos duos nostros sunt istados custrintos a disterrare a Roma, giai pro sa de bator bortas, pro proare a la cumbìnchere.
Pròpiu su 18 de Santu Gaine / Ladàmini su Presidente sardu at declaradu in su giassu de sa Regione: «Credimus fortemente in s’Agentzia Sarda de sas Intradas, ca est unu puntu calificante de su programma nostru e unu trastu importante de su controllu fiscale». Si no est chi su Guvernu Gentiloni no at chèrfidu retirare su recursu a sa Corte Costitutzionale subra s’artìculu 3 de sa lege istitutiva de s’Agentzia Sarda de sas Intradas e nos l’at blocada.
Pro custu nois de Sardigna nostra e totu sos Sardos si sunt preguntende: a ite sunt gioghende? Sa Regione nde retirat sos recursos pro s’acordare cun s’Istadu italianu e custu, pro nos torrare gràtzias, nos faghet pagare bellu e 700 milliones de acantonamentos subra sa sanidade? Sa Regione faghet sa lege pro istituire s’Agentzia Sarda de sas Intradas e su Guvernu nos l‘impunnat? B’at carchi “puntu” chi non torrat, comente in sa lìtera de Totò!
Pro fortuna Pigliaru e Paci non sunt nen feminàrgios e nen bufadores e, pro tantu, non los amus a bìdere de tzertu, cando andant a Roma, in carchi locale inghiriados de fèminas e champagne, comente aiant fatu Totò e Peppino, si nono aìamus pòdidu giae batijare s’Agentzia Sarda de sas Intradas “Agentzia Sarda de sas Entraîneuse”.