(Per leggere l’articolo in italiano cliccare sulla bandierina in alto e selezionare quella tricolore)

In s’època de s’identidade digitale, de sa moneda ismaterializada e de sa ASL ùnica, a pagare prestaziones pùblicas a manera teorica diat dèpere èssere fàtzile comente pagas àteras cosas.

Ma s’ufìtziu complicatziones afares simples est semper abetu e atzivu meda e duncas, finas a pagare una cuota (o unu ticket) de belle 12.00 èuros podet divènnere un’afare complicadu.

Semus avesos a nos chesciare de su servìtziu, aderetzende-nos a sas persones. A bias a manera ingiusta…Non semper a si curare in Sardigna est un’impresa impossìbile. Esistint ispidales bonos cun mèigos capatzos, mèigos chi costoint cun coidadu sos patzientes finas a cando s’emergèntzia est sessada.

Acontesset a s’ispissu chi sos controllos a pustis de s’interventu los fatzant in repartu, cun apuntamentos fissados a manera direta dae su mèigu curante chi connoschet s’istadu clìnicu de su patziente e nde avèrguat de persone sas mudas.

Unu in custas peleas comente si cumportat? S’andat a su mèigu de base presentende s’ùrtimu refertu, e si pedit sa prescritzione pro una bìsita de controllu (sa retzeta rùja chi connoschimus bene), chi posca si intregat a su mèigu in ispidale. Sa bìsita no est esente dae su pagamentu de sa cuota, duncas sa prescritzione depet èssere alliongiada dae sa retzida de pagamentu. Nudda de prus simple, si bivis a presu de s’ispidale in ue si faghet sa prestatzione.

Custu paru de prestatziones difatis non podet èssere regularizadu in sas càscias automàticas, in sos ufitzios postales o in sos CUP. Su pagamentu depet èssere fatu a manera obligatòria in sos “ufìtzios cuotas” de su presìdiu sanitàriu de cumpetèntzia, in sos oràrios de abertura de custos. No est postu in contu in ue tue bivis, comente ti intendes, si tue apas o nono sa possibilidade de ti mòvere cun mezos tuos o ite traballu fatzas.

Duncas, acontesset chi un’ispidale ti fisset una bìsita de controllu fora de sos oràrios de operatividade de su “ufìtziu cuotas” e tue, chi chircas a onni manera possìbile a pagare sa prestatzione dae remotu (bancas, postas, istangos) ti bides custrintu a ti leare una vitura e a fàghere sos 85 km chi sunt in mesu intre tue e su pagamentu de sos 12,9 èuros.

Sende connota sa calidade de sos caminos e de sos servìtzios nostros, ite problemas b’at?

So crosidadosu…calicunu mi ischit nàrrere in cales àteros Paisos tzivilizados unu patziente chi depet fàghere bìsitas de controllu in intro de sa matessi istrutura est oprimidu dae una burocratzia gasi manna?