(Per leggere l’articolo in italiano cliccare sulla bandierina in alto e selezionare quella tricolore)

Sardos istimados, pro more de su referendum catalanu – e afares de sa Grandi Navi Veloci cun su guvernu de Madrid – sa traversada Portu Terra-Gènova – subra su traghetu Rhapsody, no in tames dae tempus meda apedas comporadu su billete, est crastinada a data de pònnere a die.

Acadesset finas custu. Mentres isetende su reconnnoschimentu prenu de su status de insularidade (intre mesas, motziones, ordines a die e propostas de referendum) sa Sardigna morit, sas cumpagnias aèreas e de navigatzione chi manigiant su tràficu dae e pro s’ìsula sighint a fàghere comente cherent.

E sa Regione? Si nde impudat, s’arrennegat e posca si rendet. No ischimus galu cun cantu dignidade.

Su chi est capitadu oe, cun una comunicatzione a ùrtimera imbiada dae GNV a sos telèfonos tzellulares de sos clientes suos, non faghet a la crèere: “Cliente istimadu, Gnv bos comùnicat chi sa partèntzia de su 28/09/2017 in sa cursa Portu Turre-Gènova est annullada. Pro si nche pòdere torrare a prenotare bos podides cuntatare su nùmeru chi sighit.

Unu messàgiu lacònicu, chi non acrarit sas resones de su disservìtziu: sa compagnia Grandi Navi Veloci, at detzisu de apesonare sos traghetos suos a su guvernu ispagnolu, cun sa finalidasde de ospitare agentes de sa Guardia Civil, chi sunt in su portu de Bartzellona isetende de èssere impreados in unu traballu contra a su referendum.

Una de sas duas naves – su Rhapsody, chi podet ospitare 2448 passegeris – est pròpriu cussa chi diat dèvere àere garantidu su servìtziu in sa cursa Porto Turre-Gènova.

Non serbit a annànghere àteru. In contu de trasportos, comente pro àteros afares sardos de fundamentu, sa Sardigna abarrat una terra de conchista e chi mirat a custas detzisiones sena intervènnere.

At a èssere gasi finas a cando sas istitutziones sardas no ant a èssere ghiadas dae una classe polìtica chi at comente ùnica istella polare cussa de garantire sos interesses romanos in Sardigna e non sos de Sardigna in Roma.