(Per leggere l’articolo in italiano cliccare sulla bandierina in alto e selezionare il tricolore in alto)

Muledda afracat a Maninchedda e a Soru: “Bastat de cullionare a is sardos”
Mala s’afracada de s’ex assessore regionale Gesuinu Muledda a is ex alliados suos Maninchedda e Soru.
Su disaogu dd’at cunsignadu a un’artìculu longu in su profilu Facebook suo.
Alloddu, a sighire, canto ddoe cabet.
—/———-
S’ora de su “chiagni e fotti” est lòmpida. Unu cabu partidu chi fatu a Assessore at aprovadu in giunta is propostas a su cuncordu nou de sa sanidade como annùntziat tronos e lampos.
Is cussigeris suos ant aprovadu in cummissione de Cussìgiu regionale sa proposta de sa giunta. In acordu cun sa majoria. Nois creimus ca o ses in coalitzione e in giunta cun privilègios relativos e pagus doveres. O ses in opositzione. Cun doveres meda e perunu privilègiu. Su de èssere in giunta e in majoria fùrriat alternativos is progetos chi si ddoe acarant pro formare is alleàntzias ùtiles in is iscadèntzias eletorales imbenientes. E chie cheret messare non penset de colare peri a ispicare.
Su matessi balit pro sa chistione de su guvernu de su logu e pro is propostas de lege urbanìstica.
Si in mèritu narant e isterrent testos uguales in sustàntzia non bastant is proclamas e is discursos bravanteris. Si s’Assessora tua aprovat in giunta sa proposta Erriu e si is cussigeris tuos t’aprovant normas a craru in-costitutzionales e dannosas pro s’interessu e su guvernu de su bene comune non fàghet pustis a andare a giru sustenende chi cussos atos non ti pertocant. Sa polìtica si faghet a faeddos, òperas e omissiones.
Cussos de su “chiagni e fotti” sunt galu cumbintos chi pranghende e aboghinende potzant cullionare a is Sardos.