(Per leggere l’articolo in italiano cliccare sulla bandierina in alto e selezionare il tricolore)
Merculìs coladu, in su Tzentru Cungressos “L’Anfora” in Tramatza, ddoe at istadu s’assemblea de prus importu e partecipatzione de is pastores sardos lòmpidos dae s’ìsula intrea, chi pedint a sa Regione un’impignu formale e non paràulas feti.
Denùntziant, a boghe arta, chi s’Assessoradu Regionale de s’Agricultura gastat 150 milliones pro prenere sa càscia de is Agentzias suas e non pro donare rispostas a sa crisi de su setore primàrgiu. “Sa pastorìtzia istòrica sarda est morende e non faghet a perdere àteru tempus”, gasi s’at espressadu Felice Floris ghia istòrica de su Movimentu Pastores Sardos, chi in istadu de crisi de sa banda, cramat a regorta a totu is sìndigos sardos a cumbatere una batalla chi pertocat totu sa Sardigna.
At abertu sa sètzida agradessende pro sa partecipatzione manna a s’Assemblea e pro àere torradu a agatare sa fortza de sighire a in antis finas cun medas chi dae ora non si bidiant. Su pedidu de prus importu postu dae s’Assemblea est chi siat imperadu, luego, s’1% de su Bilantzu Regionale pro sarvare is tàgios de is pastores ca, si su late ddu pagant 0,50 èuros, non si podet acuntentare su bisòngiu econòmicu de su pastore sìngulu. Pedit a boghe arta finas chi ddoe apat sa decraratzione de istadu de calamitade naturale pro s’emergèntzia sicore chi, ocannu, at tocadu a s’ìsula nostra.
A costadu issoro ddoe aiat amministradores locales meda, tzitadinos e, in calidade de presidente noeddu de s’Anci Sardigna, ddoe aiat su Sìndigu de Bortigiadas, Emiliano Deiana chi at istabilidu, cun is faeddos suos, un’acordu forte tra s’Anci Sardigna e su Movimentu.
At promìtidu chi s’Anci at a èssere in Casteddu puru, in acabu de su mese de trìulas, e at a èssere a costadu de is pastores pro custa batalla. Unu passu a in antis de importu dèpidu a sa collaboratzione issoro. Felice Floris, ghia istòrica de su Movimentu de is pastores sardos at sighidu cun un’apellu isfindigadu a sa classe polìtica regionale chi at aparèssidu finas in sa pàgina Facebook de su matessi Movimentu e chi m’agradat a annanghere a s’artìculu.
“A pesare de is assembleas meda e de is fainas cumpridas in is meses passados, peruna mesura at istadu adotada pro illebiare is efetos disastrosos de custa situatzione. Cun su late chi sighit a èssere pagadu unos 50 chentèsimos a su litru non semus prus in gradu de donare de ite bivere a su bestiàmene nostru. Como tenimus bisòngiu de agiudu a beru: dimandamus un’aina pùblica lestra pro sarvare is gamas, ammentende chi is animales nostros giustìficant s’esistèntzia de un’assessoradu a s’agricultura cun prus de 3000 dipendentes.
Pedimus a su guvernu natzionale su reconnoschimentu lestru de s’istadu de calamitade naturale subra totu su logu e a su guvernu regionale s’aplicatzione lestra de is benefìtzios chi sighint”. Ddoe at istadu pro parte de is persones unos cantos interventos bellos meda. Tra is chi m’agradat a regordare ddoe at istadu su de Diego Maca, de Roberto Congia e de Alberto Congia chi fiant inderetados a de pedire a is industriales de su late de faturare totu is produtos de is pastores. Is giòvanos puru ant faeddadu e mustradu solidariedade a sa batalla de su MPS. Si pedit finas una cooperatzione tra totu is Assòtzios de categoria de sa banda agrìcula e pastorale.
Sa proposta dd’at interpretada in manera positiva s’assemblea. Non sunt, però, fartados is interventos chi ant ocasionadu a is pastores. Medas de is chi ant chistionadu ant propostu de s’arrennegare contras a is cooperativas chi còmporant is produtos a baratu a dolu de is pastores nostros. Amministradores locales chi donaiant unu contributu issoro pro una càusa de importu.
No ant fartadu mancu is iscutas de sufràgiu pro is amigos chi non sunt prus cun nois ma chi si donant ànimu pro sighire a in antis. Unu naschimentu nou de su Movimentu Pastores sardos, pustis annos sena sentire peruna passione, pro parte de medas, de “pistare is pùngios in sa mesa”. Assemblea a tretos alluta cussa de Tramatza acabada cun unu atu de fortza bellu meda: ambas corsias de sa bia istatale 131 firmadas durante 35 minutos, pro faghere cumprendere a is sardos ca no est prus ora de aguantare; a s’imbesse ddoe at bisòngiu de sighire cun custas batallas chi non serbint pro fatzada feti e pro una categoria de traballadores feti.
Sa die de atòbiu at acabadu cun una iscuta de gosu e istentu: su pràngiu in su Parcu Zìnnuri in Bauladu, a pagos chilòmetros dae su campu de batalla galu caente pro sa temperadura de eris. Pro mimi at istadu custa, dae istràngiu a su movimentu, una die bella meda in ue apo cumpresu chi nois sardos tenimus bisòngiu meda de nos aunire in is batallas contra a una polìtica regionale muda e arestosa chi non respetat sa dignidade nostra de sardos.
Sigo a ddu narrere onni borta e como ddu torro a iscriere: sena pastorìtzia, sena pastores e sena agricultura, semus lòmpidos, in tèrmines econòmicos, a s’acabu de totu. Non ddoe at economia sena su setore primàrgiu ca cussu est ghia de s’Economia sarda. Ddu depent cumprendere finas in is aposentos de su podere legislativu e esecutivu de Sardigna.
(*istudiante universitàriu in Iscientzias de is Servìtzios Giurìdicos, tzitadinu comunu e sustenidore de su Movimentu Pastores Sardos)