(Per leggere l’articolo in italiano cliccare sulla bandierina in alto e selezionare quella tricolore)

No est tzertu pro more de is tzitadinos-traballadores, si non in pertzentuale fisiològica.
Indennizos pro non piscare. Contributos pro nde bogare bìngias, olivàrios e campos de trigu. Assegnos de càscia integratzione e mobilidade pro annos e annos.
Una die ddoe at istadu finas una Comuna – Su Masu -, in ue su sìndigu, chie est oe cussigeri regionale de su Pd, chi susteniat su disterru, oferende·si de pagare su biàgiu a is giòvanos de su logu chi detzidiant de si nde andare.
Semus s’ùnica regione de su mundu in ue pagamus a is persones pro non traballare, in ue amus pranificadu unu sistema de agiudos e para-caidas chi punnant a sa mandronia, a sa dipendèntzia, a sa tzerachia, a su ricatu dae su podere polìticu. E in ue totu colat sena chi ddoe apat mancu gana de s’indignare.
E cale terra in su mundu podet tènnere benidore, si s’istrutura sòtziu-econòmica sua est organizada in custa manera?
Ddoe at manera e manera pro no abbandonare a chie est abarradu agoa. Cussu de intzentivare su non-traballu est sa prus faddida. Sa negatzione de sa Polìtica e de sa dignidade de s’indivìduu, s’ausèntzia de ispìritu de comunidade.
In custa manera parent finas pagos is 2500 sardos chi ant abbandonadu domo e bidda issoro, in s’ùrtimu annu, pro si nde andare in su furisteri. Si is cosas no mudant, ant a èssere semper de prus.
Si progetat unu genotzìdiu culturale, un’irraighinadura chi at a èssere impossibile arrangiare, unu desertu chi pro is satzerdotes cumpràghidos de sa tècnica polìtica est a fadu de Deus e in capas finas de bonas uras.
Unu delitu perfetu, e is responsàbiles ant nùmene e sambenadu.
Is sardos, pro sighire a isperare, pedint traballu. Ddu faghent non solu is giòvanos ma is tzitadinos de ogni edade. Est custu su problema de is problemas: chie non dd’at cumpresu est destinadu a èssere torradu a nudda dae sa dibata polìtica.