(Per leggere l’articolo in italiano cliccare sulla bandierina in alto e selezionare quella tricolore)

Comente est possìbile a mutire tempus bellu is dies chi non proet? Sicagna bolet nàrrere chi non s’agatat erba in is pàsculos, chi sunt istados arados e semenados de badas is erbajos, chi sunt addopiados is prejos pro mangime e foràgiu, e sa produtzione de su late mènguat de su 40%.
In su tzentru de s’ìsula nemos s’arregordat de una annada lègia che custa. Amus bidu dannos dae su nie cun àrbores mannos destruidos e interrados dae is rampos rutos. Ammuntonadas de frasca chi ruinant is pàsculos. A nde ddas bogare est costadu meda pro sas siendas chi si lu podiant permìtere, e in ue non l’ant fatu oe est totu unu prùere.
Perigulosas meda pro su fogu e fontes de infetzione pro is àrbores galu bivos. S’annada mala est unu disacatu chi ochiet unu territòriu intreu e corpat una economia giai malàida, sugeta a su malu tempus, a su mercadu vitziadu e a sa mala polìtica.
Deo no dd’isco si in sos palatzos bellos de ruga Roma e arborada Trieste, ant cumpresu a beru su disacatu chi est capitende. No isco si a beru ant cumpresu chi su late de berbeghe , chi dat a manigare no sceti a is pastores ma a biddas intreas de su tzentru Sardigna, oe benit pagadu a 60 tzentesimos cada litru dae industriales caseàrios monopolistas chi, cun su agiudu carignosu de su Istadu Italianu, produint casu in Romania e faghent cuncurrèntzia a nois etotu.
No isco si is cunsigeris regionales de su territòriu meu, sos chi cada die votant sa giunta Pigliaru chi tenet sa responsabilidade de intervènnere, cumprendent chi giai annos a oe s’ARA (assòtziu regionales pastores) aiat carculadu chi pro prodùere unu litru de late ovinu serbiant 85 tzentesimos nessi e duncas b’est unu problema mannu meda de non bi dormire su note.
No isco si si nde sapint chi onni annu sa bèndida de sa lana non coberat s’ispesa de sa tundidura de is berbeghes, e si ischint chi in Sardigna comintzat a mancare su foràgiu, e chi sas siendas inghitzant a ddu comporare in aterue a prejos chi addòpiant o trìplicant gràtzias a su preju de is traghetos , pro su cale nudda ant fatu.
Unu disacatu! Unu disacatu chi no at mòvidu perunu interventu profetosu, ne natzionale nen regionale, dae una polìtica a manera ispantosa surda a sos anneos de is persones ma atentzionada meda a is interessos de calecun’àteru.
E aici, a pustis de su dannu sa befe. Is provedimentos reghentes a subra is acantonamentos de su pecorinu sunt istados inùtiles ma a seguru unu balàngiu mannu pro is ricos industriales caseàrios chi fràigant capitales paghende a pagu su traballu de is pastores. E, in fines, àteru puru.
Is intzentivos reghentes pro sa maselladura de is berbeghes ant postu intro a su mercadu grandu cantidades de petza provochende s’ismenguadura de su valore, torrende profetu sceti pro is grossistas chi còmporant sa petza de is pastores a prejos mìseros e dda torrant a bèndere balangende·bi fintzas tropu.
Si no oe cras at arribare torra s’abba proina, Si sos porcos non morint … a sa lande giai torrant.