(Per leggere l’articolo in italiano cliccare sulla bandierina in alto e selezionare quella tricolore)

Cun unu sàrtiu de record de 250 bortas in prus de sa produtzione in 20 annos, su pane, sa pasta e sa pitza produidos cun sos trigos antigos de sa traditzione italiana torrant a su grofu.
Custu nd’est essidu a pìgiu dae una anàlisi de sa Coldiretti presentada impare a sa Sis, sa “Società Italiana Sementi”, chi a sa lòmpida de sos 70 annos at bìnchidu su bandu de su Crea, “Centro per la ricerca della cerealicoltura di Foggia” logrende gasi pro 15 annos sa esclusiva de sa reprodutzione e tzertificatzione de su trigu duru “ Senatore” Cappelli dae sa sèmena a sa mesa.
Cun 1.000 ètaros tzertificados cultivados in su 2016, su “Senatore” Cappelli est istadu su trigu duru antigu prus semenadu in Italia cun sa produtzione chi nch’est lòmpida a 2,5 milliones de chilos in su 2017 e, de fatu, est adopiada cunforma a s’annu in antis mustrende una tendèntzia contrària cunforma a sas sèmenas de trigu duru minimadas in Italia de su 8% segundu sos càrculos de sa Coldiretti in pitzu a sos datos Crea.
Est gràtzias a su coidadu de sa Sis, sa sotziedade de semenes italiana prus manna, in sa atividade de reprodutzione e tzertificatzione chi in s’ùrtimu annu nche at pesadu in artu sa cultivatzione e sa reprodutzione de su trigu duru antigu.
Su Senadore Cappelli at prus de 100 annos. A pustis de èssere lòmpidu a cobèrrere prus de sa medade de sa cultivatzione in Italia, ue aiat iscunsertadu sa produtzione de pane e pasta, in sos annos 60 aiat cumintadu a iscumpàrrere, a tales chi vinti annos como in su 1996 sa produtzione fiat falada a prus pagu de 10 mìgia chilos.
A nche torrare a su mercadu custa calidade antiga de trigu duru sunt istadas sas propiedades mannas suas de nudrimentu, gràtzias a su fatu chi cuntenet prus pagu glùtine cunforma a àteros trigos duros ma tenet una cantidade de proteinas arta cunforma a sos trigos chi li faghent cuncurrèntzia.
“ In s’ìnteri de sa tzelebratziones de sos 70 annos de sa Sis, amus chertu sa torrada de su’Senatore’ Cappelli- at naradu su presidente de sa Sis e vitzepresidente natzionale de sa Coldiretti, Mauro Tonello- ca creimus chi s’amparu de sos sèmenes antigos siat cosa de importu e non pro una chistione de archeolozia zenètica, ma ca sos consumadores lu preferint pro sas calidades suas e refudant sas produtziones fatas dae sèmenes de orgànismos mudados zeneticamente”.
Su diretore zenerale de sa Sis Mario Conti at naradu: “ Sa Sotziedade Italiana de sos sèmenes dae como 70 annos seletzionat sèmenes chi ant fatu s’istòria de su made in Italy. Nos amus leadu su càrrigu e s’onore de tzertificare sa produtzione de su trigu duru’Senatore’ Cappelli cun sas caraterìsticas zenèticas suas s’est mustrende adatu a sas esigèntzias de coltivatzione cun standard organolèticos chi currispondent a sa rechesta de una alimentatzione bona e sana”.