(Per leggere l’articolo in italiano cliccare sulla bandierina in alto e selezionare quella tricolore)

Dae unos cantos mese assòtzios e movimentos sardos medas si addòviant e resonant de guvernu de su territòriu, amparu de su paesàgiu e de s’ambiente.

S’ocasione pro unu primu acaramentu est istadu su disinnu de lege de su guvernu regionale in matèria urbanìstica: subra custu tema si sunt fatos paritzos istùdios e propostas cuncretas, presentadas su 20 de abrile in un’addòviu, prenu de gente, in su Caesar’s Hotel, gràtzias finas a s’agiudu organizativu de Rossomori e Possibile; pro s’ocasione si sunt postas sas bases de fràigu de unu protzessu de diàlogu intre sos ambientalistas de sa Sardigna.

Dae sas relatas de istèrrida e dae su dibàtitu sunt essidas a campu formas medas de su DDL, chi non sunt cumpatìbiles cun sas isperas de guvernu bonu de su territòriu, e chi cuntrastant cun su PPR chi su candidadu Frantziscu Pigliaru naraiat chi cheriat afortire e pònnere in vigèntzia finas in sas zonas internas.

Sos assòtzios pedint a sa Giunta Regionale e duncas a su Cussìgiu de suspèndere s’esame de su DDL – chi non si podet emendare in sas partes prus de significu – e de aviare una fase de acaramentu chi incluat sas comunidades locales de sa Sardigna e totu sos operadores chi si impreant de turismu e chi non cumpartzint sa possibilidade de fraigare in sas marinas e mescamente in sos 300 metros dae s’imbatu, trantzende de ruinare sa resursa prus manna de sa Sardigna.

A tales chi su dibàtitu esseret mandadu a dae in antis a manera prus produtiva, atziva e cun sa volontade de intervènnere a cunsonu e cun una boghe ebbia cando at a rechèdere, WWF, GRIG, Italia Nostra, FederParchi ant detzìdidu de fàghere nàschere sa “Consulta Ambiente e Territorio della Sardegna”.

Sa Consulta at a àere finas unu comitadu iscientìficu. In su primu faghent parte Giuseppina Angioni, Maria Laura Cadeddu, Massimo Dadea, Salvatore Dessena, Mauro Gargiulo, Antonietta Mazzette, Giuseppe Melis, Maria Paola Morittu, Sandro Roggio e Alessio Satta.

Su grupu est abertu a àteros espertos de defensa de sa terra, gestione ambientale e pranificatzione de su territòriu.

Sa Consulta s’at acarare a manera periòdica in contu de polìticas de guvernu de su territòriu, e in contu de initziativas de leare pro s’amparu de su paesàgiu e de s’ambiente, fraighende propostas cuncretas e ponende a cùrrere valutaziones diferentes a sos sèberos de su guvernu regionale chi sunt incoerentes cun su Pranu Paesìsticu Regionale, e a sas leges de gestione de su territòriu e amparu ambientale de sa Sardigna cada borta chi at a èssere pretzisu.