(Per leggere l’articolo in italiano cliccare sulla bandierina in alto, passando a quella tricolore)

Assentende sos apuntos e sos documentos in artziu, maicantu mannu, meu “ Ambiente “ apo agatadu unu iscritu de su mese de Santandria de su 2013 chi m’aiat imbiadu Pitzente Migaleddu.
Pagu in antis m’aiat fatu una telefonada prena de amargura, narende-mi de cantu si intendiat curpidu ma no ispantadu de s’atacu chi unu sindacadu territoriale l’aiat fatu in unu discursu chi sas organizatziones de sos traballadores aiant aprontadu pro nàrrere Eja a sa tzentrale a carbone de Clivati in Otzana.
Torrende-la a lèghere, b’apo agatadu unu ligàmene primorosu cun su chi est capitende in custas dies a fùrriu de sa chistione Fluorsid.
Custu est su chi aiat iscritu Pitzente:
“In su mundu iscentìficu “business bias” inditat s’interferèntzia in sos resurtados de una chirca ligada a su cunflitu de interessos chi ligat su chircadore a una industria o a unu tzentru de poderiu. Sas rivistas sèrias, a prus de una decraratzione de ausèntzia de cunflitu de interessos, pedint a revisores disconnotos su giudìtziu in contu a una chirca cun sa tenta de averiguare sa bàlida de su mètidu e sa fundadesa de sos resurtados.
In su mundu de su giornalismu oe su problema “business bias” no est cosa simple a resorvere; su ligàmene chi ligat unu giornalista a una indùstria o a unu tzentru de poderiu ( chi no est semper de tipu editoriale), a ispissu, ponet chie iscriet in una situatzione de dipendèntzia acrarada, no abastat prus s’onestade intelletuale pro assegurare una informatzione lìbera.
Mi informant chi unu cuotidianu locale mi atibiat sa responsabilidade de àere ispainadu sos datos de unu istùdiu (SOMO) ordinadu dae Greenpeace chi pertocat sas mortes primadias pro brusiamentu de carbone.
A nàrrere sa beridade, in sa relata fata a boghe in Otzana e in cudda iscrita cunsignada a sa Comuna, apo tentu contu pròpiu de non mentovare nudda de cussu istùdiu.
In sa literadura iscentìfica e in sas linias de ghia subra a sa calidade de s’aera de s’Organizatzione mundiale de sa sanidade esistint datos bene fundados de sighire in contu a sos dannos chi faghet a sa salude sa brusiadura de sos fòssiles e a manera particulare de su carbone.
Sa relata chi deo apo iscritu, intames, isàminat sos perìgulos in sas protzeduras, in sos disignos, in s’ambiente e fintzas pro cantu pertocat sa salude chi si podent aberare cun sa brusiadura de su carbone, e custu bidu dae sa parte de sos interessos de sas comunidades de sos zassos a fùrriu de mesania de su Tirsu, interessos chi, a dolu mannu, nche sunt a largu dae cussos de sas padronias e de sos sindacalistas, cuddos chi faghent puru sos consulentes de sas aziendas.
Torramus a su giornalismu locale e a su “business bias”pro ammentare comente su tzentru de poderiu de riferimentu e no intames cussu editoriale at unu interessu de importu in sa produtzione de energia dae su carbone, pro fàghere unu assempru, in Ligùria.
B’at de nàrrere chi sa cuntierra subra a sa chirca SOMO de Greenpeace fata dae unu funtzionàriu de su Ministeru de sa Sanidade, at logu in sas pàginas de su giornale e no in cuntestu iscentìficu acreditadu. Duncas proite a non proare a la propònnere in sa colònia, mancari cun sa cumpritzidade de carchi aministradore locale professionista de dopiesa?

Làstima chi totu custu càpitet in unu momentu de dificurtade pro s’Isula, treulada non dae sas acontèssidas de sa sorte, ma dae sos cambiamentos de su clima pro neghe de sas emissiones de su gas serra pro s’impreu ossessivu de sos combustìbiles fòssiles; sende chi, intames, su sensu de solidariedade de comunidade nos diat dèvere fàghere meledare in contu a sos interessos de sa colletividade in sa zestione de s’ambiente e de su territòriu chi est giai bastante minetzadu pro favorèssere sos interessos de pagos.