(Per leggere l’articolo in italiano cliccare sulla bandierina in alto)

Sa sienda de su presidente de su Cagliari Calcio Giulini est acusada de disastru ambientale, e s’ùnicu cummentu suo est: “Tristura, in presone sa famìllia mia”.
Presidente Giulini, deo pagu e nudda dda connosco. Su fùbalu mai l’apo istimadu ma sa terra mia giai, e meda. M’at ispantadu a intendere, cara a cussas acusas graes meda, chi s’anneu suo est totu pro cussos personàgios chi bois mutides “famìllia”.
Ma cumpresu ais chi cussas matessi persones sunt acusadas de disastru ambientale grae?
Non bos ponides in pistighìngiu pro su fatu chi cussos velenos allogados, a manera difìtzile meda s’ant a pòdere eliminare dae is faldas acuìferas e dae su terrinu? (si chistionat de ètaros meda belle che arruinados).
Non bos ponides in oriolu pensende a cussos dannos orrorosos creados dae su ghetare àtzidos e sustàntzias perigulosas intro sa laguna de Santa Gilla arruinende a seguru su ecosistema?
Non dda turmentat s’idea chi unu nùmeru disconnotu de persones diant pòdere pigare o giai ant pigadu calicuna maladia grae meda (càncaru a sa conca) pro more de su prùere dannosu chi in Assèmini, agiumai, si arrimaiat in is ventanas formende unu pìgiu biancu orrorosu.
A beru mi bolides nàrrere chi cara a custas acusas de disastru ambientale (e, a bisu meu finas crìmine contra s’umanidade) bos preocupades sceti chi custos 7 dirigentes ddos ant arrestados cando nche fiant ancora in su letu a is sete de mangianu?
Acusas fraigadas pro more de intertzetatziones e dannos ogetivos chi nemmancu si podent discùtere?
A beru aici mi narat?
A dd’ischides chi is maladias chi s’ant pigadu is animales faghiant creschere sena rimèdiu dentes e ossos cun suferèntzias orrorosas?
Presidente, custas acusas sunt graes meda, is dannos fatos a sa terra nostra non si podent perdonare.
Custas sunt cosas chi pesant òdiu, a bois òdiu cun su coro meu totu.
Cun peruna istima, Clàudia