(Per leggere l’articolo in italiano cliccare sulla bandierina in alto)

Sos veterinàrios de sa Asl – a pustis de vìsitas e anàlisis in sos pegos infetados – aiant diagnosticadu sa fluorosi, patologia chi pròvocat sa crèschida esagerada de sos ossos e dentes de sos animales chi non resessint prus a s’alimentare.
“Sos abitantes de Macchiareddu”, iscriet Sardinia Post, tzitende s’ordinàntzia de su Gip, “si sunt chensciados pro sa presèntzia de prùere biancu in sas domos, brusiore in ogros e in sas vias respiratòrias. Si sunt dados fintzas “efetos noghiles in sos fìgios minores”, a cantu paret pulmonites sighidas. Àteras contestatziones sunt: interru e ghetadura de fluorsilicatos, ludos àtzidos, amiantu, ògios industriales, cloruru e traballos in campu abertu de sustàntzias velenosas.
Si totu custu est beru si diat tratare de s’ùrtima violèntzia ordimingiada contra de sa terra nostra dae unos filibusteris bènnidos dae su nord de s’Itàlia in sos ùrtimos chimbanta annos. Impresàrios bènnidos prus pro balangiare milliones chi non pro dare unos cantos istipèndios.
Cantos istipèndios balet sa violèntzia e s’avelenamentu de sa Sardigna, sa cundenna sua a unu tempus benidore industriale furende·li su deretu chi tenet a campare in armonia cun sos abitantes suos?
E cantas àteras Fluorsid bi sunt, intre Sarroch, Portovesme, Teulada, Quirra, Capo Frasca, Ottana, Portu Turre e Deus ebbia ischit si in aterue?
E pro cantu tempus devimus aguantare su ricatu de pagos istipèndios e sa trasformatzione de sos operajos e traballadores de sa Defensa (duas caras de sa matessi medàllia de su matessi ricatu e de su matessi sutaisvilupu) in iscudos umanos?
E pro cantu tempus sos tzitadinos sardos pensant de dare una manu a sa classe polìtica sarda, inghenugrada a in antis de su bipolarismu italianu farsu?
Cando in fines dìamus pòdere isperare de abbaidare a su tempus benidore faghende propostas noas, catzende·nche sos avelenadores de sa terra e sos referentes polìticos issoro?