(Per leggere l’articolo in italiano cliccare sulla bandierina in alto)

Unos cantos printzìpios, de cuntestu, a pitzu de s’indipendentismu chi istat in su mundu reale cun sos pees bene postos in terra.
Traballat pro s’autodeterminatzione de sos sardos. Pro chi sos sardos podant una die isseberare su destinu pròpiu istatuale: detzìdere cun unu referendum lìberu, populare, si istare cun s’Itàlia o fraigare un’Istadu pròpiu. Custu est s’obietivu ùrtimu. In s’interi: conchistare zonas de poderiu semper prus ampras e promòvere leges chi tutelent sos interessos e su progressu de sos sardos, fintzas e mescamente cando custos sunt minetzados dae sas pretesas de s’Istadu tzentrale italianu.
Traballat pro durare in su tempus. S’obietivu de su referendum pro s’autodeterminatzione non si podet acumprire a manera immediata. Pro custa finalidade bi devent èssere unu movimentu e unu grupu polìticu chi siant capatzes de si arraighinare in sas cussèntzias, èssere presente in ogni logu e traballare pro tempus meda. Si est netzessàriu fintzas pro deghinas e deghinas de annos, pru addae de sos tèrmines eletorales e sos liders potentziales. Si tratat in definitiva de fraigare una formatzione chi in sos annos achistet sa rilevàntzia de unu Scottish National Party o àteros sìmiles.
Non leghet o intèrpretat sa realidade cun filtros ideològicos. Leghet e intèrpretat sa realidade partende in antis de totu dae unos datos cuncretos. Sa farta de cuncretesa e pragmatismu impedit de faeddare a sos interessos e a sos bisòngios reales de sos sardos. Est fintzas angenu a estremismos, retòrica, fòrmulas e frases fatas rimbombantes, chi ponent fogu a sos ànimos ma no umprint sas urnas de votos.
Traballat cun e pro totu sos istratos de sa sotziedade sarda. Balàngiat sos cunsensos e amparat sos deretos de su ricu e de su pòveru. Est trasversale, ca totu sos sardos, de cale si siat classe, ant a balangiare dae sa majore libertade de sa Sardigna. A su matessi tempus punnat a su tzentru de su corpus eletorale pro atràere s’atentzione de sos moderados de destra e de manca. Su cunsensu de su tzentru est indispensàbile pro intrare numerosos in sos entes locales e in su consìgiu regionale, in ue si podet traballare a manera cuncreta pro s’autodeterminatzione de sos sardos.
Cumbinchet sos moderados chi sos interessos issoro non cointzident prus cun sos italianos ma cun sos de una Sardigna lìbera. Ròsigat dae intro sos cumbinchimentos de su blocu sotziale chi sustentat oe a sos partidos italianos pro nche giùghere custu blocu a s’autodeterminatzione. Custa est sa faina prus difìtzile e tocat a la fàghere sena creare clientelas o intrare in una polìtica de cuncàmbiu. Ca si nono si diat tratare de remplasare unu blocu nou de poderiu a su betzu, sighende fitianu sas peus pràticas: sa cosa prus a tesu dae una autodeterminatzione verdadera.
Mustrat a sos indetzisos esempros de autodeterminatzione bene resèssidas, in sas impresas e in s’amministratzione pùblica. Fràigat esempros noos de autodeterminatzione de bona resèssida in sas impresas e in s’amministratzione pùblica. In Sardigna non fartat gente chi bi l’at fata a in foras de s’assistentzialismu, sena pedire pragheres o acotzos, cumpetende in su mercadu cun ostinu e balentia. Petzi bidende e tochende cun sas manos unu modellu resèssidu ispinghet a s’autodeterminatzione chie oe pensat de istare mègius cun s’Itàlia o in sas clientelas o in s’àmbitu de s’agiudu pùblicu. Economia e bonu guvernu de su territòriu sunt sos duos campos de atzione cuncretos in ue medis sa resèssida pròpia.
Creet in sa pessone e in sa comunidade. Non bidet unu cunfrontu intre cultura urbana e cultura rurale, ma interessos cumplementares. In sa Sardigna de su sèculu XXI, sas duas culturas s’ant a sarbare o ant a mòrrere paris.
Cunsìderat su ventàlliu polìticu indipendentista ispeculare e alternativu a su ventàlliu polìticu italianu. Favoresset sa diferentziatzione màssima de sas formatziones indipendentistas, pro chi s’oferta polìtica siat ampra su tantu pro satisfàghere sa dimanda de totu sos eletores sardos. Non traballat cun sos partidos italianos, chi non tenent in s’orizonte issoro s’autodeterminatzione de sos sardos. Sa collaboratzione est simplemente impossìbile, francu chi una die sos partidos italianos, in sos entes locales o in su consìgiu regionale, non si cunvertant a s’obietivu de s’autodeterminatzione.