(Per leggere l’articolo in italiano cliccare sulla bandierina in alto)

Fintzas a oe aio pensadu semper chi a leare parte a una manifestatzione pro cuntierrare contra a carchi cosa esseret una chistione de voluntade: sa voluntade de proare a fàghere carchi cosa pro mudare su chi creimus chi no andat bene, pro cuntierrare contra a unu sistema, unu impòsitu e pro afirmare unu deritu.
In sos ùrtimos annos apo leadu parte a unas cantas manifestatziones e a corteos, a bortas m’apo postu sa pregunta si a beru nde fiat bàrfida sa pena, e m’apo dadu custa resposta: pro megiorare custu mundu, tocat a faeddare, partetzipare ca istende acherados “a sa bentana” non b’at manera de lu fàghere ca sos cambiamentos, in s’istòria, bi sunt istados pro more de sos chi si sunt mòvidos.
Fintzas a oe apo pensadu chi pro partetzipare a sas manifestatziones bi cheriat ebbia sa gana de fàghere. Oe est cambiada carchi cosa, mi so abbista chi non abbastat. Pro essire dae domo tocat de tènnere sos nervios firmos. Tocat a èssere in cunditzione de si pònnere frenu.
Bi cheret capatzidade de cumprèndere sa situatzione e de ischire comente e cando est su momentu giustu pro nàrrere cale si siat paràula. Bi cheret inteligèntzia e sa capatzidade de istare sulenu. No est de importu cantu siat sa contrariedade nostra pro su chi cherimus cumbatare, tocat a istare sulenos ca basta pagu pro colare dae ativista a brigadore. Custu pro more de sos chi pro traballu nos diant dèvere dare seguresa a totus, est a nàrrere siat a sos cuntierradores chi a sos chi sunt a s’àtera ala.
Sos tutores de s’òrdine pùblicu, cun divisa e bene achipagiados, non mi fiant pàrfidos mai che inimigos, los bidio semper comente òmines e traballadores. Fiant pro me una garantzia, in sos corteos fiant sos prus atentos, sos chi averiguaiant chi non b’aeret impèigos, comente unu malintragnadu caratzadu de manifestadore, pro nàrrere.
A dolu mannu meu, oe mi so agatada in una situatzione chi non si podet crèere a la contare.
Posca de unu viagiu de tres oras pro lòmpere a su polìgonu, posca de una manifestatzione “ de isetu”, ue no amus tentu sa possibilidade mancu de nos acurtziare a su logu, sìmbulu de su poderiu militare, posca de s’istrachesa e su disconsolu chi si segaiat a fitas, detzido de mi nche andare paris cun chie fia bènnida.
Aimus parchegiadu sa màchina in unu camineddu de foraidda in una ispètzia de parchegiu improvisadu a pagu tretu dae su logu de s’atopu. Su caminu ue fiant sos manifestadores fiat serradu in ambas partes dae sas fortzas de s’òrdine ultres chi in su caminu de àidu a su polìgonu. Peristantu andende a sa essida bidimus una cosa chi nos est pàrfida luego sena contu nen cabu.
S’ischera de politzotos, totu bene achipagiados, non si movent. Arreent unu mototziclista, bidimus chi faeddat cun su capiscuadra. Istudat su motore e narat chi no lu faghent colare. Deo penso “ bi det àere carchi dificurtade cun su mototziclista”.
A pustis de pagu, intames, m’abbigio chi sa dificurtade est pro chie si siat chi cherfat colare a in antis o a in segus e fintzas pro chie si nche cheret andare e custu mancari chi sa manifestazione siat giai agabbada. Su cabiscuadra narat chi non si podet, tocat de tènnere passèntzia, chi cando si leat parte a una manifestatzione si suponet chi totu apant “su matessi intentu”.
Penso chi “s’intentu chi nos aunit est chi non semus de acordu subra a su sistema de produtzione de bombas, ue a su isfrutamentu de su territòriu chi at reduidu Quirra a no èssere connota pro su mare e sas prajas de incantu ma comente logu de maladias, de tumores, de criaduras chi naschent giai cun sa carena male formada. Duncas custu ebbia est su intentu chi nos aunit”.
Su cabiscuadra sighit a nos impidire su passagiu narende chi tocat de tènnere passèntzia e chi pro “democratzia” (?) devimus isetare a bìdere ite detzidint sas àteros pro nos nche andare totus paris(?!) S’istrachidudine e su fatu de mi serare sena perunu àrchidu faghent efetu e cumintzo a mi infadare de custa manera de fàghere. Pregunto a su politzoto pro ite non podimus essire e mescamente chi non cumprendo proite devo isetare, naro chi sos manifestadores faghent parte de medas grupos e benint dae logos diferentes de Sardigna e chi non potzo isetare chi deghinas de pessones chi mancu connosco detzidant cando recuire a domo.
Su politzoto graduadu mi narat chi si fia istada prus sulena, mi nche fia giai pòtida andare. Tando mi annervio galu de prus, chirco de mi apasigare e pongio passos pro illeniare sos nèrvios. Intopo unu de sos manifestadores e mi preguntat de su chi est capitende, li naro chi sa essida est tancada, m’abigio chi sa gente est cuntrestende de custa cosa ca no l’agradat a istare cue, tenta e atrumada a malagana e sena perunu motivu.
Sigo a caminare in sos pagos metros lìberos de su caminu: a unu chirru su plotone bene achipagiadu e a s’àteru sos manifestadores infadados e pistighingiosos. Mi paret de èssere a curtzu a iscopiare una briga, e non pro neghe de brigadores ma de cuddos chi devent amparare a totus, cuddos chi devent garantire e mantènnere in pasu su logu.
Sigo a caminare e m’arrumbo a una màchina, ma s’anneu no agabbat. Pedo torra chi mi fatant colare e li naro a su graduadu chi su cumportamentu suo no est deghile, chi est faghende annerviare sa gente, e chi deo mi nche chergio andare. Mi intendo presonera, cun una neghe ebbia, chi est cussa de mi nche chèrrere andare dae cussu logu. Posca de àteros minutos de “ purgadòriu “ nos lassant colare.
Mi pregunto ite fiat pòtidu capitare si a su postu meu b’esseret istada una pessone prus furiana e fintzas prus apitzinnada, de seguru si fiat bortada male pro defèndere su deritu sagradu a si mòvere in libertade. Cherio nàrrere chi in unu istadu ue non b’at penas seguras, ue sos delincuentes e sos mortores torrant lìberos a pustis de pagos meses de presone, ue pessones meda ant fatu s’isperièntzia de istare in presone sena peruna neghe, sa gente no si intendet acunortada dae cuddas pessones chi non intames de fàghere su dovere issoro, si ponent contra a chie dae issos isetat amparu. E cando custu capitat in una cunditzione chi una de sas partes non si podet defèndere sa cosa est galu prus grae.