(Per leggere l’articolo in italiano cliccare sulla bandierina in alto)
Dae sa setzione de su PsdAz de Thiniscole ritzemus e publicamus.

S’Acontèssida de su 25 de su mese de martzu coladu, promòvida e cuncordada de sa Setzione de su P.S.d’Az. “Luisu Ozanu” de Thiniscole, at istadu de importu mannu, pro bisuras meda superiore a cantu isetadu e a is intentos propostos.
No at istadu una “simpli e inùtile passarella” de atores indipendentistas, prus pagu puru una “aparada retòrica de printzìpios”. Sa presentatzione de s’iscritu de Carlo Pala, Ideas de Sardigna, in prus de èssere ocasione pro connoschere su libru e s’autore, at istadu iscuta pro faghere acarare a pare ogni fortza polìtica chi in Sardigna s’ispirat in manera autèntica a is valores de su sardismu.
Custu est fatu nou e pro nois de importu mannu. Istòricamente custu est acontèssidu pagas bortas in s’istòria sarda, foras de is modellos de aunida polìtica pre-eletorales de avesu.
In prus de sa definitzione de is chistiones tentas in contu dae su sardismu, in s’atòbiu nd’at essidu a pìgiu sa voluntade de propassare is positziones diferentes (Columbu, Muroni, Devias, Cumpostu, etz.), chi a dolu mannu abarrant abertas e malas a acarare in unus panorama chi su mustrat galu coloridu e diversificadu.
Tra is diversidades presentes ponimus annotu in unas cantas cramadas a sa soberania o a s’indipendentismu e in sa diferente inderatada ideològica respetu a is categorias traditzionales de dereta e de manca. Intentu fiat su de betare bases noas pro unu diàlogu, pro un’acarada, chi a bisu nostru ant a depere sighire e s’adelantare conca a s’unidade polìtica, in gradu de produere creschimentu e resurtos superiores in favore de sa Sardigna ma chi refudent is particularismos sena sustàntzia.
Creimus chi s’acarada depat sighire finas in àteras sedes, e s’isperu est chi sigat finas a chistiones ispetzìficas, comente a sa revisione de s’istatutu, sa dibata subra is intradas, s’allega acapiada a su logu, a sa limba sarda e s’amparu de s’ambiente, a sa relatzione cun s’istadu (autodeterminatzione, federalismu, indipendentismu e soberania). Subra cussas ùltimas bisuras est netzessàriu traballu in prus pro ddu definire, de prus craresa de is cuntzetos a in antis de is protzessos de pònnere in atu in manera cumprida e subra su modellu de esperièntzias maduradas in àteras realidades europeas.
A bisu nostru Sa Sardigna est a in antis de un’ocasione istòrica, addua is iscadèntzias ordinàrias eletorales, est a narrere sa de propassare is contrapositziones, e is “partziduras pagu orgànicas” pro agatare unidade polìtica e duncas prus fortza cuntratuale in s’acarada e in sa cumprida de is intentos polìticos.
Non diamus chèrrere chi su caminu, signadu dae sa setzione P.S.d’Az. de Thiniscole, si potzat in calicuna manera firmare. Cumbidamus is atores chi ant partetzipadu a s’acontèssida a sighire e a progetare aterus iscutas de atòbiu.
Calicuna borta fartant is ocasiones, ma chie at a coro sa sorte polìtica de s’ìsula diat depere agatare finas s’ora e su logu pro cuncordare momentos ùtiles de partecipatzione e de meledu subra chistiones de fundamentu.
Dae bia nostra, comente militantes de sa setzione P.S.d’Az. de Thiniscole, in respetu de is règulas democràticas, castiamus cun interesse e sustenimus fainas sìmiles, e amus a sighire in sa deretura giai signada in su cungressu tzitadinu e cunfirmada su 25 de su mese de martzu passadu: promovere s’acarada e punnare a un’aficu sotziale generale pro ingendrare cunditziones noas e ideas noas inghìriu a is allegas caentes de su sardismu in bista de sa coesione e aunida tra fortzas sardistas.

Sa Diretzione polìtica de sa Setzione Partidu Sardu de Atzione “Luisu Ozanu” de Thiniscole:
Sarbadore Guiso, Gigi Patteri, Alèssia Pau, Antoneddu Pipere