(Per leggere l’articolo in italiano cliccare sulla bandierina in alto)

Senadore Floris istimadu,
Apo lèghidu sa respusta sua a sa lìtera mia e mi paret pretzisu nàrrere una borta galu sa mia. Vostè cumbidat a unu diàlogu trancuillu subra de su tema de su demàniu militare e torrat a nàrrere chi s’initziativa organizada dae s’iscola mia fiat inoportuna pro more de s’ausèntzia de sos rapresentantes de sas “fortzas armadas” e in resone de su matessi tìtulu chi amus dadu a cussu eventu, est a nàrrere “Sardigna terra de bombas e cannones”.
Discuidende su fatu chi unu cunfrontu in manera difìtzile podet resurtare trancuillu cun una interrogatzione parlamentare subra de sa conca mia e subra cussa de totu sos collegas chi cumponent su Collègiu de sos Dotzentes de s’iscòla mia, mi permito de li fàghere notare chi in sa respusta sua vostè trascurat unos cantos datos ogetivos chi est pretzisu torrare a marcare.
A su contràriu de cantu torradu a contare dae sa narratzione bostra in Parlamentu, sas fortzas armadas sunt de domo in sas iscolas sardas, in proportzione majore meda cunforma a àteras regiones. Sa Sardigna benit a pustis petzi a sa Pùglia, a sa Campània e sa Calàbria pro su nùmeru de interventos de sos militares in sas iscolas.
De su restu sos Ministèrios a sos cales ais giradu s’interrogatzione l’ischint bene, pro ite su datu (fatu connòschere dae su Sòtziu de istudentes de s’Universidade de Casteddu “Scida”), si podet agatare in manera fàtzile online, a intro de su protocollu de intesa intre sos Ministèrios de sa Defensa e de s’Istrutzione dae su cale est leadu.
In Sardigna su nùmeru de sos interventos de s’Esèrtzitu Italianu in sas iscolas est pari a 30, e est pròpiu sa de bator regione a intro de s’istadu italianu. Senadore, est seguru a beru chi in s’iscola siat carente sa presèntzia de «figuras tècnicas, polìticas o militares chi potzant sustènnere sas resones de sa presèntzia de custas bases e polìgonos in su territòriu de sa Sardigna»?
Postu chi, comente apo giai tentu ocasione de nàrrere, a sa dibata organizada a su litzeu Mossa su contraditòriu fiat presente, essende rapresentadu s’Istadu pro mèdiu de s’onorèvole Scanu (chi comente penso vostè at a ischire si collocat subra de unu pianu polìticu atesu dae a mie annos lughe), pro ite crèet chi sos militares apant su deretu de fàghere girare su puntu de vista issoro in sas iscolas – issos eja sena contradditòriu – e imbetzes àteras figuras chi cumponent sa sotziedade no apant nemmancu facultade de paràula? So unu democràticu cumbintu e custu puntu non resesso pròpiu a lu aguantare.

Senadore, no isco si vostè est a connoschèntzia, ma in iscolas diferentes de s’ìsula si festat galu sa “bìnchida” de Vittorio Veneto. No agatat singulare e fintzas unu pagu anacronìsticu chi in sos annos Duamìgia si festet galu s’èsitu de cussu obrobriosu e inùtile massacru chi fiat sa Gherra Manna e chi at bidu su sacrifìtziu umanu de deghinas de sardos giòvanos chi sunt istados irraighinados dae sa terra e dae su traballu issoro pro èssere imbiados a su masellu? No auguro a niunu collega e a niunu Dirigente iscolàsticu de subire una interrogatzione parlamentare, però diat èssere ùtile pesare una dibata in mèritu a s’utilidade e a su valore pedagògicu de custas initziativas.
Tando Senadore, comente bidet sa presèntzia de rapresentantes de militares e fintzas sa esaltatzione discutìbile de calicunas “binchidas militares” est pro nudda carente in sas iscolas sardas cunforma a cantu lamentadu in sa interrogatzione bostra.
Como diat chèrrere bènnere a su nùmene de s’eventu cuntestadu dae vostè. Apo propostu “Sardigna terra de bombas e cannones” pro su fatu simple chi de fatu sa Sardigna est una terra de bombas e de cannones. Custu fatu podet pràghere o non pràghere, ma est pròpiu unu fatu. Si podet fintzas crèere, comente pro esempru sustenit vostè, chi sos presìdios militares costituant unu fatu positivu, ma sa presèntzia de sos matessi rapresentat unu datu chi in medas non pigant in cunsideru, a cumentzare dae sos pitzocos e dae sas pitzocas de sa se iscolas nostras.
Sa Sardigna est sa regione prus militarizada de Europa. In Sardigna sunt presentes sos tres polìgonos militares prus mannos de Europa e sa terra nostra acollet su 61% de sas servitudes militares de s’Istadu.
De custu datu si nde podet faeddare o non si nde podet faeddare? Si podet informare sos pitzocos chi b’est unu protzessu in cursu in ue subra de su bancu de sos imputados setzint sos cumandantes chi ant diretu su Polìgonu de Quirra «pro àere cajonadu unu persistente e grae disastru ambientale cun perìgulu chìmicu e radioativu mannu pro sa salude de deghinas de mìgias de animales, de deghinas de pastores, de su personale de sa base e de tzitadinos medas» (comente si leghet in su cabu de imputatzione de sa Procura)? Si podet faeddare de sos rilievos nòdidos de sa ASL de Lanusè subra sas malformatziones de sos animales de allevamentu, subra sas mortes de sos pastores chi frecuentaiant su Polìgonu e subra de sa presèntzia de tòriu radioativu e de àteras sustàntzias noghiles in sas carenas issoro?
Tando Senadore, in iscola si podet faeddare de sa realidade o si depet petzi esertzitare sos pitzocos a cumpilare test invalsi e cuitzetones notzionìsticos pro lòmpere a s’Universidade?
Vostè mi preguntat de «operare cun s’ispessore morale artu chi apo pertzepidu dae sa lìtera sua» e deo chèrgio sighire su cussìgiu suo.
Apo a sighire duncas a fàghere su traballu chi apo seberadu ocupande-mi de sos medas bisòngios formativos e pedagògicos de sos pitzocos. Apo a sighire a mandare a in antis sa batalla mia pro ite in iscola si potzat e si depat faeddare de totu su chi pertocat sa Sardigna e sos sardos e duncas apo a sighire a organizare adòbios e dibatas de argumentos vàrios, faghende cabu petzi a sos crismas de sa democratzia collegiale e de su balore pedagògicu-educativu de sas initziativas.
Si pro custu apo a dèpere patire àteras interrogatziones parlamentares, provedimentos disciplinares, santziones e àteras cosas apo a èssere cuntentu de las afrontare cun serenidade e determinatzione.
Saludos corales