(Per leggere l’articolo in italiano cliccare sulla bandierina in alto)

Anthony istimadu,

Apo lèghidu, dende-bi atentu meda, sos apretos postos dae Massimo Dadea.

Sos numeros, pro su chi pertocat sa ingraidàntzia e su partu, sunt sustàntzia, sunt s’espressada de s’oriolu pro sa seguresa de sa fèmina e de sa criadura.

S’organizatzione mundiale de sa sanidade at istabilidu una làcana ( in s’iscentzia no esistit su biancu e su nieddu) chi andat paris a su de cùrrere pagos arriscos de salude, custu cheret nàrrere milli partos in s’annu.

S’Italia at derogadu atzetende 500 partos in s’annu. Suta a custa làcana, mescamente suta sos 100 partos sa capatzidade de gestione de eventos clinicos raros e graves meda est maicantu infadosu.

Sas sotziedades iscentìficas de s’Istitutu Superiore de Sanidade sunt intervènnidas, mescamente pro su resartu chi at tentu s’imagine de sas chimbe fèminas chi mustraiant sa matza, chi est istada posta e torrada a pònnere in mustra dae sos cotidianos italianos prus mannos e dae personagios de sa televisione.

Si apo a tènnere manera apo a pònnere a disponimentu sos datos de sos 10 migia partos chi acontessent in Sardigna cun sa medida de sa distàntzia dae sa residèntzia a su repartu ostètricu ( distacadu).

Sos resurtos de sa prima anàlisi, cunforma a sa currente printzipale de informatzione, sunt ispantosos. Naradu custu nos amus postu su problema de amparare sa fèmina de Sa Madalena, proponende una leada in gàrrigu pro totu sos noe meses, cun isàminos ematochìmicos, ecografias, educatzione a su partu in su ispidale Merlo, cun sa valutatzione de s’arriscu ostètricu, cunsiderende custu proponimus su trasferimentu, acumpangiadu, amparadu, a su repartu ostètricu (distacadu) de Olbia.

Sa ASSL s’at a leare su gàrrigu de sos gastos de istrangìa. E in ogni casu prevididu unu servìtziu de ginecologia pro gestione de eventos urgentes in s’ispidale. Su servìtziu at a èssere garantidu dae personale chi mantenet sa cumpetèntzia clìnica traballende in sos servìtzios de su Ispidale de Olbia, est a nàrrere cussa cumpetèntzia chi sos nùmeros permitint de isvilupare esperièntzia clìnica.

Duncas non b’at abbandonu ma amparu de sa seguresa menguende s’istrobbu de su ispostamentu.

S’eventu postu in resartu dae sos giornales in sas dies coladas cunfirmat chi su modellu est giustu, ca unas caraterìsticas ostètricas de sa partòrgia aiant pòtidu fàghere cùrrere arriscos mannos a sa mama e a sa criadura.

Mi dispraghet de respìghere cun revesa s’ipòtesi chi a in segus de custu sèberu bi siant resones econòmicas: s’ispidale de Sa Madalena produit servìtzios pro 3 milliones e est finantziadu cun prus de 13 milliones!!!

De acordu cun s’ANCIM semus arresonende in contu de sa proposta de unu servìtziu sanitàriu diferente pro sas ìsulas minores tengende contu de sos residentes ma fintzas de sa punna a su turismu.

Pro cantu pertocat s’emodinàmica de Lanusei, a manera isperimentale, si dat una resposta a una pedida de prestatziones endovascolares, no urgentes, ma pro protzeduras programmadas, cun modellu de collaboratzione intre unu servìtziu chi faghet sa proa e unu chi la rechedit.” Su tzentru est su de Cardiolòzia de s’Universidade de Casteddu chi ponet a disponimentu unu cardiòlogu cun unu nùmeru de protzeduras prevididas dae sa sotziedade iscentìfica.

Su documentu de su Pianu Natzionale Esitos de s’AGENAS, documentat chi sa populatzione de s’Ogiastra at unu nùmeru de prestatziones cardiològicas suta de sos standard (semper numeros).

Sa prima parte de s’esperièntzia est istada positiva in contu a èsitos, a seguresa e a sos costos. Perunu atu de sa Giunta serrat ispidales, sa delìbera de sa rete de sos ispidales est in cunsìgiu; intames, pròpiu rispetende su Decretu Ministeriale70, impreat sas derogas pro decrarare sos presìdios sanitàrios minores comente ispidales de zonas disagiadas.

Pedimus cun fortza su cambiamentu de modellu pro fàghere a manera chi sos ispidales fatzant funtzione de ispidales pro malaidos graes: sos datos de sos recòveros testimoniant in Sardigna s’impreu de sos ispidales pro patologias de cumplessidade bassa e mèdia e pro tropu tempus, patologias chi agatant resposta in su territòriu. Pro custu impreamus unu milliardu de euros!!

Pro custu est chi amus propostu ispidales comunidades, unu isvilupu de curas intermèdias e unu modellu nou de curas territoriales, in ue sa domo de sa salude, prus chi no unu fràigu rapresentat unu modellu culturale de traballu in grupu in sos territorios lacanantes.

In finitia dia chèrrere preguntare proite si si narat Santu Rafaele andat bene intames si si narat Qatar andat male?

Chie at batidu su Santu Rafaele?

Perunu ingrangeu de dinari a nemos, ma recùperu de una mobilidade passiva a sos ispidales de su Nord Italia chi in Gaddura est pratigada meda.